Mazkur tadbir oldidan "Bunyodkor", "Andijon" klublari sobiq direktori, tajribali mutaxassis Ulug'bek Mirzaev fikr va takliflari bilan o'rtoqlashdi.

"Har yili qura tashlash marosimi berger tizimida o'tkaziladi. Lekin futboli rivojlangan mamlakatlarda "Opta", "SciSports" tizimlari yo'lga qo'yilgan. Taqvim tuzishda shulardan foydalaniladi. Bilasizmi, bugun futbol katta sport darajasidan ham oshib ketdi. Hozir marketing, biznes, translyaciyalari bilan oldinga siljidi. Masalan men Superliga qurasini avtomatik tarzda tasodifiy usul bilan taqvim aniqlanishiga qarshiman. Buni yarim avtomatik tarzda amalga oshirsa bo'ladi. Yani taqvimni tuzib turib, ayrim joylarini inson faktori asosida o'zgartirish mumkin. Nima uchun? Tasodifiy tanlash usulida bitta jamoa ketma-ket kuchli raqiblar bilan tushib qolishi mumkin. "Xorazm", "Mashal" kabi jamoalar mavsumga qiynalibroq tayyorgarlik ko'rayotgan, tarkibi oddiyroq jamoalarni mag'lubiyatga uchrab qolishi ularning homiylari, muxlislarini, futbolchilarni sovutib qo'yadi. Masalan, APLda yarim avtomatik tarzda o'zlari o'zgartirish kiritishadi. Bitta jamoa qattiq zarba olib qolmasligi inobatga olinadi. Rossiya, Franciya, Italiyada o'zlari tuzib chiqadi. Qura o'tkazmay klublar bilan kelishib taqvimni tasdiqlashadi.

Yana shunday holat borki, "Paxtakor", "Bunyodkor", "Xorazm", "Mashal", OKMK klublari Toshkent va Toshkent viloyatida o'ynashadi. Ularning uy o'yinlarini alohida kunlarga qo'yish kerak. Muxlislarda uchrashuvlarni stadionda kuzatish imkoni ko'proq bo'lardi. Katta bellashuvlarni alohida kunlarga ajratish maqsadga muvofiq hisoblanardi. Deylik "Neftchi"ning o'yinlariga Andijon, Farg'onadan ko'p muxlislar kelishi mumkin.

Bizda Termiz issiq xudud. Bu bilan "Surxon" ko'proq safarda o'ynashini taminlash mumkin. Misol uchun OCHLda qatnashadigan "Andijon", "Nasaf"ga engilroq raqiblarni ro'baro' qilish mumkin. Yana o'tgan yili futzal bo'yicha Jahon chempionati o'yinlari Andijonda o'tkazildi. Bu jamoaning uy o'yinlariga to'g'ri kelib qoldi. Taqvim tuzishda mana shu kabi omillarni hisobga olish zarur",- deydi Ulug'bek Mirzaev.

Superliga qurasi oldidan. Mutaxassis fikri: "Futboli rivojlangan mamlakatlar qura tashlashda boshqa tizimlardan ham foydalanmoqda"