Мавсум якунига қадар 5 та тур қолди. Яъни, аллақачон "жўжаларни санайдиган" вақт келди.

Келинг, биз ҳам турнир жадвалининг якуний кўриниши ҳақида ўз ҳисобимизни қилиб кўрамиз. Тасаввур қилинг, олдиндаги ўйинларда ҳам 1-даврадаги натижалар айнан қайд этилса, қандай бўлар эди? Бунинг учун клубларнинг 9-13-турларда кўрсатган натижаларига эътибор қаратамиз (Тақвимнинг 22-26-турларида яна ўша баҳслар такрорланади).

Биринчи давра якунидаги 5 турда барчадан кўпроқ очкога "Пахтакор" эга чиққан (13). 4 рақибини мағлуб қилган "шерлар", "Сўғдиёна" билан дуранг ўйнагани ҳолда 13 очко олганди.
Кейинги ўринни Миржалол Қосимов бошчилигидаги АГМК ва Ҳамиджон Актамовнинг "Қизилқум"и банд қилган — 10 очко.
"Насаф" — 9 очко. "Металлург" ва "Локо"га имкониятни бой берган "аждарлар" "Андижон", "Сўғдиёна" ва "Қўқон-1912"га қарши ўйинларда 3 баллдан олган.
"Навбаҳор"нинг ҳисобига 8, "Бунёдкор", "Локомотив" ва "Машъал"га эса 7 тадан очко ёзилган.
5 ўйиннинг 4 тасида майдонни голсиз тарк этган "Сўғдиёна" 6, "Металлург", "Андижон" ва "Сурхон" 4 очколик бўлган.
Яйпанниннг "Турон" клуби 5 ўйинда 5 дона очко олган бўлса, Бахтиёр Ашурматов бошчилигидаги "Қўқон-1912" энг ёмон натижани кўрсатган — 3.

Агар олдимизда турган 5 ўйинда жамоалар 1-даврадаги натижаларни такрорлашса, турнир жадвали қуйидагича бўлар эди.

	клуб	ўйин	очко
1	"Пахтакор"	21	64
2	АГМК	21	47
3	"Насаф"	20	45
4	"Сўғдиёна"	21	45
5	"Қизилқум"	21	41
6	"Бунёдкор"	21	40
7	"Локомотив"	21	39
8	"Навбаҳор"	21	37
9	"Қўқон-1912"	21	31
10	"Машъал"	21	25
11	"Металлург"	21	23
12	"Сурхон"	20	21
13	"Андижон"	21	21
14	"Турон"	21	17

Фақат охирги 5 та тур натижаларини қайта ёзиб чиққанимиз туфайли "Насаф" ва "Сурхон" ўртасидаги 19-турнинг қолдирилган ўйинига тегилмади.

Мавсум охирида "Пахтакор"нинг 1-бўлишига шубҳа қиладиганлар бўлмаса керак. Зотан, барча "шерлар" чемпионликни нечанчи турда расмийлаштириши билан қизиқяпти. Аммо айни пайтда меддаллар учун курашда жуда қизиқ ҳолат вужудга келди. 1-даврадаги натижалар такрорланса, АГМК ва "Насаф" Жиззах клубидан ўзиб кетади. Бунда Рўзиқул Бердиев шогирдлари қолдирилган ўйинни ютса, кетма-кет 2-йил кумуш медалга сазовор бўлиши мумкин. "Қизилқум" эса пойтахтнинг 2-жамоасини ортда қолдириб, 5-поғонага кўтарилади. "Навбаҳор" қаторасига 3-мавсум 8-ўрин билан кифояланади.

Шквирин бошчилигидаги "Турон" 1-бўлиб элитани тарк этиши кутиляпти. Агар сўнгги турдан кейин ҳам "Андижон" ва "Сурхон"нинг очколари тенг келса, Термиз клуби юқорига жойлашади. Чунки ўзаро ўйинлардаги устунлик Баҳром Ҳайдаров шогирдлари томонда. Барчаси яқин 45 кун ичида ҳал бўлади. Воқеалар ривожини кузатамиз.

Сиз қандай фикрдасиз? Мавсум охирида турнир жадвали шундай кўриниш олиши мумкинми? Суперлигани 2 хусусий клуб ("Андижон" ва "Турон") тарк этадими?

"Темир одам" "Турон"да ўйнаяпти

Суперлигада ҳисоб вақти: Кимга медаль, ким Про лигага?