Toshkentda shu kuni hamma narsa ajoyib edi. Ob-havo futbol o'ynaydigan darajada super, stadiondagi muhitga alohida tasannolar. "Jar" stadionida esa "burgutlar" parvoz qildi.

Tarix yaratilgan oqshom

"Paxtakor" o'z tarixida birinchi marotaba Toshkentda "Andijon"ga mag'lub bo'ldi. Jamoalar shu kungacha poytaxtda 28 marotaba uchrashishgan bo'lib, 24 ta o'yinda "sherlar" g'alabasi qayd etilgan. 4 ta uchrashuvda tomonlar murosa ko'chasini tanlagan. Yana bir fakt shuki, "burgutlar" 26 yildan so'ng raqibi darvozasiga 3 ta gol urdi. Bunday holat so'nggi bor 1999 yilgi mavsumda "Paxtakor" stadionida bo'lgan va unda 3:3 hisobidagi durang natija qayd etilgan.

"Andijon" raqibini o'z uslubida engdi

Kecha hamkasbimiz Abdulvosit Bektemirov matbuot anjumanida murabbiyga "Andijon" 15 yil oldin ham "Paxtakor"ga qarshi himoyaviy o'ynaganini takidladi. To'ppa-to'g'ri joyida berilgan savol. Bu narsa kecha kutilgan edi, keyin ham bo'ladi. O'yin davomida ham Xomyakov taktikasi, imzosi yaqqol bilinib turdi. Bunga qarshi taktika, reja ishlab chiqish Moreyraning zimmasida turgan edi. "Burgutlar" kecha o'z rejalaridan ortiqcha tashqariga chiqqani yo'q va buni raqibiga o'tkaza oldi ham. Ular urgan 3 ta golning 2 tasi standart vaziyatlardan so'ng bo'ldi. Burchak, jarima to'plari, yuqoridan keladigan to'plarda yutib chiqish Xomyakov jamoasining muhim fishkasi va ustun nuqtasi ekanligini bilasiz. Lekin buni portugaliyalik bilmadi va unga qarshi kerakli qurolni ishlab chiqmadi. Avval aytganimizdek Pedru Moreyra shogirdlari asosan to'p nazoratiga etibor qaratyapti, to'p bilan oldinga yurmoqda. Kecha ham ular bu borada ular katta farqqa ega chiqishdi, 71 foiz. Gap esa buning g'alabaga etarli bo'lmayotganida. Jamoa ishtirokidagi o'yinlarda aynan raqiblar o'ziga moslashtirib olmoqda, o'zining ustun tarafi, rejalarini o'tkaza olyapti. "Andijon"da esa mag'lubiyatsiz seriya davom etadi. Jamoa bu yil etakchilar "Nasaf", "Navbahor"dan so'ng esa Toshkentda "Paxtakor"dan ochko tortib oldi. 9 ochkodan 5 tasini o'z darajasidan nisbatan balandroq jamoalar bilan uchrashuvlarda qo'lga kiritdi.

Moreyra manziliga malomatlar

Janob Moreyra "Paxtakor"dek to'p bilan o'ynashni yaxshi ko'radigan jamoaga 80 foiz raqiblar ikkinchi raqamni tanlaydi va xuddi "Andijon" qilgan ishni qiladi. Bu esa ularning aybi emas, chorani topa olmayotgan sizning aybingiz. Futbolchilar maydonda sizning ko'rsatmalaringizdan kelib chiqib harakat qiladi. Faktlarga qaraymiz.

- "Sherlar" 5 ta turda 4 ta mag'lubiyatga uchradi va bu tarixdagi eng yomon startlardan biri amalga oshib bo'ldi.

- 4 yildan so'ng Jizzaxda "So'g'diyona"ga 3 ochko sovg'a qilindi.

- "Paxtakor" 8 yildan keyin o'z maydonida "Dinamo"ga engildi.

- "Andijon" Toshkentdan g'alaba bilan qaytdi.

Bu ketishda birin-ketin hamma tarixlar qayd etib bo'linadi (shekilli).

Vodiydan qochib vodiyga

Jamoa uyda vodiy jamoasi qarshiligini enga olgani yo'q, endi ular yana vodiyga aniqrog'i Farg'onaga safar qilishadi. "Neftchi"ning oxirgi o'yinlaridan kelib chiqsak 3 ochkoni berib yubormasligi ehtimoli katta. "Andijon" maydoniga Vadim Abramov "Dinamo" bilan keladi, keyin esa Jizzaxga safar qilinadi.

Tahlil. Xomyakovning rejasi ish berdi. "Burgutlar"ning andijoncha g'alabasi haqida