Uchrashuvdan so'ng Tailand bosh murabbiyi Aleksandr Polking fikrlarini bildirdi.

O'yin haqida

- Ilk navbatda, O'zbekiston terma jamoasini g'alaba bilan tabriklayman. Jamoangiz yaxshi o'ynadi hamda haqli ravishda birinchi o'rinni qo'lga kiritdi. Sizda yaxshi jamoa shakllangan. O'yin davomida jamoa himoyadan hujumga o'tishda tezkorlik namoyish etdi. Bizda esa ortga qaytishda xatoliklar yuzaga keldi. Shunga qaramay, biz bu erga Osiyo Kubogiga yo'llanma olish uchun kelgandik va maqsadimizga erishdik. Jamoviy o'yinimizni yaxshilash uchun oldimizda bir yil muddat bor.

- Nima uchun birinchi taymdan so'ng birato'la to'rtta o'zgarishga qo'l urdingiz?

- Birinchi taym haqida taasurotlarim yaxshi emas, shu sababli, to'rtta o'zgarishga qo'l urdim.

- Bugun himoyalanishda Shomurodovga ko'proq etibor qaratildi, shu bois uning atrofidagi futbolchilar erkin o'ynashdi. Himoyalanishda Shomurodov uchun alohida reja tuzganmidingiz?

- Shogirdlarim faqatgina Shomurodov emas, Masharipovni ham qattiq qo'riqlashga harakat qildi. Ikkalasi ham xavfli o'yinchi. O'zbekiston bugun odatdagidan kuchliroq o'ynadi. Raqib futbolchilari o'yin davomida o'z joylarini tez-tez o'zgaritirishdi, himoyadan hujumga tez o'tishdi, bu ham bizga salbiy tasir ko'rsatdi.

- Osiyo Kubogigacha bir yil vaqtingiz bor. Bu muddat qanchalik tasir qiladi jamoaga?

- Bizda juda tig'iz vaqt kutib turibdi, chunki futbolchilar klublarda ham faoliyat ko'rsatadi. Ularning klub safidan jarohatlarsiz kelishi muhim ahamiyatga ega. Barchaning tarkibda bo'lishi ishimizni osonlashtiradi.

- Fikringizcha, O'zbekistonning o'yinini qanday yaxshilash mumkin?

- Har qanday jamoani yanada yaxshi bo'lishga undash mumkin. O'zbekiston tartibli o'yin ko'rsatadi, tarkibida top chempionatlarda to'p tepadigan futbolchilar bor, ular mahoratli. O'zbekistonning eng kuchli o'yinini aynan bugun guvohi bo'ldik.

- Raqib bunday o'yin taklif etishini kutganmidingiz?

- Biz qo'rqmasdan hujumlar tashkillashtirib, oldinga o'tishga harakat qildik. Ishonchim komilki, keyinchalik shunday raqibga duch kelsak, nima qilish kerakligi borasida mahorat darsi o'tadik. Kelgusi bosqichda yaxshiroq o'yin ko'rsatishga harakat qilamiz.

Tailand bosh murabbiyi: "O'zbekistonga Osiyo kubogiga yo'llanma olish uchun kelgandik va maqsadimizga erishdik"