Biz esa o'tgan mavsum yakunida boshlagan "tur iqtiboslari" ruknimizning yangi yildagi ilk sonini havola qilamiz. Bunda o'tgan turda murabbiylar tomonidan aytilgan fikrlar haqida so'z boradi.

Yaypanda kechgan vodiy derbisida "Neftchi" penaltidan urilgan gol evaziga 1:0 hisobida g'alabani tantana qildi. Uchrashuvdan so'ng farg'onaliklar bosh murabbiyi Ilhom Mo'minjonov hakamlik borasida quyidagicha fikr bildirdi.

"Bugun saviyasi baland hakamlar ishladi. VARda ko'rib chiqib, shunday xulosaga kelishdi. Vaziyatni ko'rmasdan turib, bir nima deya olmayman. Allohga shukrki, bugun g'alaba qozondik". (s) Ilhom Mo'minjonov

Mag'lubiyatni qabul qilib olgan "Qo'qon-1912" ustozi Baxtiyor Ashurmatov yo'qotilgan uch ochkoda hakamlarni aybdorlamasligini aytdi.

"Mag'lubiyatimizga hakam aybdor deb aytolmayman. Yutqazdikmi, demak, yutqazdik. Yutuq uchun etarlicha harakat qila olmadik deb hisoblaymiz va yo'qotilgan ochkolar o'rnini keyingi turlarda to'ldirishga intilamiz". (s) Baxtiyor Ashurmatov

Shu kuni Toshkentda "Olimpik" Termizning "Surxon" klubini qabul qildi. Yoshlardan iborat poytaxt klubi bosh murabbiyi Timur Kapadze matbuot anjumanida tarkibga legioner jalb qilinmagani haqidagi savolga ochiq javob berdi.

"Bizga legionerning keragi yo'q. Maqsadimiz bunday o'yinlar orqali tajriba olish. Osiyo chempionati turibdi, Olimpiada yo'llanmasini qo'lga kiritishimiz kerak. O'zimizning yigitlar legionerlardan ham yaxshi harakat qiladi". (s) Timur Kapadze

O'z navbatida "Surxon"ning yangi ispaniyalik murabbiyi Anxel Lopes o'zbek futboli bilan tanishish jarayoni borasida fikrini bildirib o'tdi.

"O'zbekistonga kelgunimga qadar ko'p malumotlarga ega emasdim. Bundan tashqari ispaniyaga yosh mutaxassislar kelganda tanishgandik. Qolaversa, "Al Shabab"da ishlaganimda Aziz Haydarov to'p tepgan. U orqali ko'p malumotlarni bilib olgandim. Mening telefonimda hali ham uning kontakti bor. Har kuni qo'ng'iroq qilib maslahatlashib turamiz". (s) Anxel Lopes

1-turning markaziy uchrashuvi Namanganda bo'lib o'tdi. Biroq o'yin kutilganidek shiddatli tus olmadi. "Navbahor"ning bosh murabbiyi Samvel Babayan muxlislar haqiqiy "Navbahor"ni qisman ko'rishganini takidladi.

Muxlislar bugun "Navbahor-2022"ni faqat qisman ko'rishdi. Birinchi taymdagi dastlabki 20 daqiqa va uchrashuvning oxirgi 35 daqiqasida. Bu yil qiziqarli chempionat bo'ladi, deb o'ylayman". (s) Samvel Babayan

"Nasaf" Superligani safarda qo'lga kiritilgan bir ochko bilan boshladi. Shu kuni stadionga tashrif buyurgan ishqibozlar ajoyib muhit yaratishdi, deya olamiz. "Ajdarlar" nimaning evaziga ochko olishni uddasidan chiqdi?

"Bizning asosiy taktikamiz 4-3-3, bu taktikada Bozorov, Nurulloev o'ynaydi. Ammo Superkubokda shu taktikada o'ynadik va o'yinimiz u qadar yaxshi chiqmadi. Shu bois bugun taktikani o'zgartirdik, Turkiyada "Navbahor" vakillari barcha o'yinimizga borishdi va obdon o'rganishdi. Taktikani o'zgartirganimiz "Navbahor"ga qiyinchilik tug'dirdi." (s) Ro'ziqul Berdiev

AGMK bosh murabbiyi Mirjalol Qosimov "Metallurg"ga qarshi kechgan uchrashuvdan keyin hujumchilar haqida gapirar ekan, jamoaga katta hissa qo'shib kelayotgan Zafar Polvonovga insoniylik tomondan hurmat ko'rsatilganini gapirdi. Mutaxassisning ushbu so'zlari tahsinga loyiqdir.

"Zafar Polvonovni jamoadan ketkazish insoniylik jihatdan noto'g'ri bo'lardi. U jamoa uchun mehnat qilgan, faoliyatini shu erda yakunlamoqchi. Shu bois, u ham jamoada qoldi. Bu ish bugun bor, ertaga yo'q. Lekin inson hamisha inson bo'lib qolishi kerak. Polvonovga boshqa jamoalardan takliflar bo'ldi, lekin u rad etdi. Uch hujumimiz bor ekan, boshqa o'yinchi sotib olishga zarurat tug'ilgani yo'q". (s) Mirjalol Qosimov

Dastlabki turdan so'ng murabbiylarning yana qaysi fikrlari etiboringizni tortdi?

"Taktikani o'zgartirganimiz "Navbahor"ga qiyinchilik tug'dirdi" - murabbiylardan 1-tur iqtiboslari