Бугун Тошкентнинг "Локомотив" клуби Жиззахда меҳмон бўлади.

Жамоаларда кайфият қандай?

"Локомотив" 10-турда "Қўқон-1912" билан тўнашди. 20 июнь куни Тошкентда ўтказилган баҳсда Бахтиёр Ашурматов шогирдларининг қўли баланд келган эди.

"Сўғдиёна" эса ўтган турда Тошкентда меҳмон бўлиб, "Пахтакор"дан очко тортиб олишни уддалади.

Мусобақа жадвали

Айни пайтда "Локомотив" турнир жадвалида 8-ўринни эгаллаб турибди. Микаэль Секейра шогирдларининг ҳисобида 10 ўйиндан кейин 14 очко бор. "Темирйўлчилар" 10-поғонадаги "Навбаҳор"дан 1 очко олдинда бўлса, 3-ўриндаги АГМКдан 5 очко орқада бўлиб турибди.

Улуғбек Бақоев бошчилигидаги "Сўғдиёна" эса 22 очко билан 2-бўлиб турибди. "Сўғдиёна" пешқадам "Пахтакор"дан 4 очко орқада бўлса, 3-ўриндаги АГМКдан 3 очко олдинда боряпти.

Ўзаро учрашувлар

Мазкур жамоалар Ўзбекистон чемпионати доирасида жами 26 бор тўнаш келишган. 5 учрашув жизахликларнинг ғалабаси билан якунланган, 17 ўйинда "Локомотив"нинг қўли баланд келган бўлса, 4 учрашувда дуранг қайд этилган.

Алоҳида таъкидлаш лозимки, ушбу клублар иштирокидаги сўнгги 3 ўйиннинг барчасида Улуғбек Бақоев жамоаси зафар қучган. "Локомотив" 2017 йилнинг августидан буён Жиззахда ғалаба қозона билмаяпти.

Сўнгги ўйин

"Сўғдиёна" ва "Локо" ўртасидаги сўнгги баҳс 2020 йилги мавсумнинг 18-турида ўтказилган ва унда 2:1 ҳисоби қайд этилган эди.

Coca Cola Суперлига. 18-тур
СЎҒДИЁНА – ЛОКОМОТИВ 2:1
Голлар: Болтабоев 20, Жўрабеков 34, Туропов 64.
2 октябрь. Жиззах. "Сўғдиёна" стадиони. 17:00
Ҳакамлар: Жасур Мухторов, Аваз Абдуллаев, Сардор Нишонбоев, Санжар Назаров
Назоратчи: Дмитрий Роман
Комиссар: Лазиз Қўчқоров
"Сўғдиёна": 27.Милан Митрович, 2.Сардор Қулматов, 3.Искандар Шойқулов (5.Аюбхон Нўъмонов 76), 7.Санжар Рашидов (14.Даниель Насриддинов 69), 8.Жамшид Болтабоев, 11.Жасур Ҳасанов, 18.Шавкат Муллажонов, 19.Жавоҳир Қаҳрамонов, 20.Баҳодир Насимов (21.Саҳоб Рашидов 61), 22.Шаҳбоз Жўрабеков, 93.Марко Колакович (4.Элёр Орифов 76).
Захира: 1.Ширинбой Абдуллаев, 25.Нодирбек Куйбоков, 30.Диан Талхатов, 36.Элёр Собиржонов, 70.Комилжон Қаҳоров.

"Локомотив": 35.Жавоҳир Илёсов, 3.Жаҳонгир Абдумўминов (4.Шаҳзод Шайманов 71), 7.Кахи Махарадзе, 11.Темурхўжа Абдухолиқов, 14.Азизбек Амонов (9.Кирилл Погребняк 82), 20.Ғулом Ҳайдар Ғуломов, 26.Дилшоджон Комилов ( 5.Славко Дамьянович 59), 28.Шуҳрат Муҳаммадиев, 37.Шерзод Файзиев, 52.Жалолиддин Жумабоев, 77.Диёржон Туропов.
Захира: 13.Рустам Нартаджиев, 17.Савелий Абрамов, 19.Авазбек Ўлмасалиев, 23.Абдул Азиз Юсупов, 25.Жавоҳир Алижонов, 80.Фарруҳ Иброҳимов.
Огоҳлантиришлар: Митрович 3, Шойқулов 12, Абдумўминов 17, Жўрабеков, 57, Насриддинов 90+1, Погребняк 90+3.

Тахмин

Кўп эҳтимол билан "Сўғдиёна"нинг мағлубиятсиз одими 11-турдан кейин ҳам давом этса керак. Жамоа етакчиси Шоҳруз Норхонов 19 июнь куни ўтказилган "Пахтакор" билан ўйинда ўзини кўрсата олмаган эди. Учрашувдан кейинги матбуот анжуманида Улуғбек Бақоев шогирдининг терма жамоа йиғини туфайли 1 ой йўқотгани ва "шерлар" билан ўйинга қадар клуб машғулотларида иштирок этолмаганини айтди. Бугун Шоҳруз кичик "камбэк"ни амалга ошрса керак. Эслатиб ўтамиз, Норхонов айни пайтда Суперлига тўпурари бўлиб турибди.

Факт: Бугунги учрашувни Акобирхўжа Шукруллаев бошчилигидаги ҳакамлар бригадаси бошқариб боради. "Сўғдиёна" жамоаси мазкур рефери ишлаган ўйинларда ҳали бирор марта мағлуб бўлмаган.

Эслатиб ўтамиз, Жиззахдаги учрашув Тошкент вақти билан 20:00 да старт олади.

Тахмин: "Локо" Жиззахда очко йўқотади