Xabaringiz bor, bugun JCH-2022 saralash bosqichidan o'rin olgan O'zbekiston - Yaman uchrashuvi bo'lib o'tadi. Bugungi o'yinda jamoamizni yangi murabbiy boshqaradi. Falastindan mag'lubiyatga uchralgach, Ektor Kuper istefoga chiqarildi va uning o'rniga Vadim Abramov bosh murabbiy etib tayinlandi. Shunday ekan, bugungi o'yinga qiziquvchilar ko'p.

Kecha Telegram kanalimizga "O'zbekiston - Yaman uchrashuvini qaerda ko'rasiz?" degan so'rovnoma qo'ydik. O'tgan bir kun ichida so'rovnomada 12 mingga yaqin muxlis ishtirok etib hamma o'ziga maqul kelgan variantni tanlagan.

51% Uyda (6048 ovoz)

16% Ishxonada (1919 ovoz)

14% Ko'ra olmayman, matnli kuzataman (1646 ovoz)

13% Stadionda (1548 ovoz)

4% Do'stlar davrasida (485 ovoz)

2% Choyxonada (291 ovoz)

Ko'rib turganingizdek, eng ko'p ovozni "Uyda" variantini to'plagan. So'rovnomada ishtirok etgan 6048 muxlis (51%) bugungi o'yinni uyda ko'rishni maqul bilyapti. Endi ko'pchilik viloyatliklar poytaxtga kelib ketgandan ko'ra uyda tomosha qilishni afzal bilishlarini tushunsa bo'ladi. Bir tomondan achchiqqina ko'k choyni damlab televizor qarshisida yonboshlab futbol ko'rganga nima etsin.

O'yin 17:00da boshlanadi. Bu esa ish vaqtiga to'g'ri keladi. Shunday ekan, har kimda ham stadionga kelish yoki uyga vaqtli ketish imkoni yo'q. Shu bois "Ishxonada" ko'raman varianti 1919 ovoz to'pladi. Shuningdek, bazilar bu paytda safarda yoki bo'lmasa ish bilan boshqa joyda bo'lishlari mumkin. Ular uchun esa eng maqul yo'l saytimiz orqali uchrashuvning matnli versiyasini kuzatish maqulroq. "Ko'ra olmayman, matnli kuzataman" variantiga 1646 ovoz kelib tushgan.

1548 muxlis esa "Stadionda" variantini tanlagan. Bugun "Paxtakor" stadioni liq to'lmasa ham ko'plab muxlislar kelishini kutsa bo'ladi. Endi baribir futbolni stadionda jonli tomosha qilishga hech nima etmaydi. Harqalay milliy terma jamoa o'ynaganda muhit umuman boshqacha bo'ladi.

485 kishi "Do'stlar davrasida" degan variantni tanlagan. Balki kimdir yaqin o'rtoqlari bilan biron joyda futbol ko'rishga kelishib olgan bo'lishi mumkin. Va nihoyat "Choyxonada" varianti 291 ovoz to'plagan. Aksar ishqibozlar futbolni yig'ilib choyxonada ko'rishni afzal bilishadi. Chunki choyxonada gurung qiziydi.

P.S. Hamyurtlarimiz o'yinni qaerda ko'rmasin, O'zbekiston milliy terma jamoasidan birinchi navbatda g'alaba kutib qolamiz. Bizga bugungi o'yinda g'alaba nihoyatda zarur. O'yinni yutaylik va 4 kundan so'ng Singapurga xushkayfiyatda yo'l olish nasib etsin.

Telegram bot. O'zbekiston - Yaman uchrashuvini qaerda ko'rasiz?