"Rahbariyat tomonidan oldimizga qo'yilgan minimum vazifa bajarildi. Guruhdan chiqqanimizga xursandmiz. Nimchorak finalda "Al Hilol" bilan to'qnash keladigan bo'ldik. Bu jamoa "Paxtakor"ga qarshi bellashuvda yomon taassurot qoldirmagandi. Endi O'zbekiston sharafini faqat "Lokomotiv" OCHLda himoya qiladi. Buyog'iga barchamiz birgalashib muxlislik qilsak foydadan xoli bo'lmaydi. Umid qilamanki, hammasi yaxshi bo'ladi", - dedi Temurxo'ja Abduxoliqov.

- Jamoa OCHL guruh bosqichini ko'tarinki kayfiyatda o'tkazdi. Dastlabki beshta turda jamoa hujumkor, tajovuzkor o'ynadi. Lekin aynan bugungi uchrashuv muxlislarni ranjitdi. Shaxsan sizga "Lokomotiv"ning ko'rsatgan o'yini yoqdimi?

- Har doim ham o'yindan qoniqib bo'lmaydi. Masalan kecha "Paxtakor" zo'r o'ynadi, barcha ularning o'yinidan zavq oldi. Ammo yakundachi? Nima bo'ldi? Yoki "Nasaf"ning o'yinlarini ko'pchilik maqtagandi, muxlislar qoniqishgandi. Ammo ular ham guruhda qolib ketishdi. Masalan katta kuch bilan oldinga o'tib, hujumkor o'ynab, ammo yakunda kerakli natijani qo'lga kirita olmaganimizda nima bo'lardi? Biz avvalo ehtiyotkorlik bilan o'ynadik. Hech qaysi jamoa goldan sug'urtalanmagan. Garchi guruhda peshqadamlik qilib turgan bo'lsakda, mag'lubiyat bizni keyingi bosqichsiz qoldirishi mumkin edi. Natijani o'ylab o'ynadik. Raqib himoyaga urg'u qaratgani uchun biz ham bor kuchimizni ishga solmadik. Oldimizda turgan vazifani uddaladik.

- Nimchorak final o'yinida eski tanish, "Al Hilol"ga duch keldinglar. Imkoniyatlarni qanday baholaysiz?

- Bu jamoa bilan o'tgan yili guruh bosqichida duch kelgandik. Bu safar ulardan alamimizni olishga harakat qilamiz. Agarda barchamiz birga, bir tan-u, bir jon bo'la olsak, unda bu jamoa to'sig'idan ham o'ta olamiz. Agarda bazi muxlislar o'zlarini bugungidek tutadigan bo'lishsa, unda bizga yanada qiyin bo'ladi. Men boshqa jamoa muxlislarini bizga ishqibozlik qilishga chorlamoqchi emasman. Hammaning o'z tanlovi va o'z jamoasi bor. Kim kimni qo'llab-quvvatlashni o'zi hal qiladi. Bizga ishonch bildirgan muxlislarga esa minnatdorchilik bildiraman.

Shahboz Beg'amov suhbatlashdi.

Temurxo'ja Abduxoliqov: "Al Hilol"dan alamimizni olishga harakat qilamiz"