18 oktyabr kuni O'zbekiston o'smirlar terma jamoasi Panama o'smirlariga qarshi bahs bilan BAAda davom etayotgan U-17 o'smirlar o'rtasidagi jahon chempionatidagi ishtirokini boshladi. Dilshod Nuraliev shogirdlari Fujayra shahridagi stadionda S guruhi 1-tur o'yinida Panamalik o'smirlarga qarshi maydonga tushdi.

O'yinning birinchi bo'limida bir qator havfli vaziyatlar yaratilganiga qaramay, hisob ochilmadi. Ikkinchi bo'lim esa, birinchisiga qaraganda ancha tezkor va shiddatli kurashlarga, darvoza tomon berilgan zarbalarga boy bo'ldi. O'yinning 56-daqiqasida panamalik futbolchi Sarvar Karimov qo'riqlayotgan darvoza tomon chamasi 25 metrlardan kuchli zarba berdi. Ushbu zarbani esa, faqatgina darvoza ustuni qaytarib qoldi. O'yinning 63-daqiqasida esa, birinchi bo'limda ancha faol harakat qilgan Akobir To'raev o'rniga Shoxjahon Abbosov maydonga tushirildi.

Etiborlisi, O'zbekistonning ushbu jahon chempionatidagi ilk goliga aynan Abbosov mualliflik qildi. O'yinning 68 daqiqasida panamaliklar jarima maydonchalarining o'ng qanotida o'zbekistonlik futbolchiga nisbatan qoida buzishdi. Dostonbek Hamdamovning jarimadan uzatgan to'pini esa, maydonga tushirilganiga 3 daqiqa ham vaqt bo'lmagan Shoxjahon Abbosov darvozaga to'g'irlab qo'ydi - 1:0.

Uchrashuvning qolgan daqiqalari ham, asosan Nuraliev shogirdlari ustunligida o'tdi. O'yinning 77 daqiqasida burchakdan oshirilgan to'pni darvozabon qaytardi, ammo jarima maydonchasiga yordamga etib kelgan qanot himoyachisi Rustamjon Ashurmatov to'pni erga tushirmay darvozaning o'ng burchagiga joyladi - 2:0.

O'yinning qolgan daqiqalarida hisob o'zgarmadi va shu tariqa, O'zbekiston o'smirlar terma jamoasi BAAdagi jahon chempionati bahslarini g'alaba bilan boshladi.

Nuraliev shogirdlari musobaqaning 2-turida, bugun guruhning ikkinchi o'yinida Xorvatiyani 3:1 hisobida mag'lubiyatga uchratgan Marokash o'smirlar terma jamoasiga qarshi maydonga tushadi. Ushbu uchrashuv 21 oktyabr kuni Fujayradagi stadionda bo'lib o'tadi.

U-17 JCH. Fujayra stadioni.
C Guruhi, 1-tur.
PANAMA (U17) - O'ZBEKISTON (U17) - 0:2
GOLLAR: Shoxjahon Abbosov (68), Rustamjon Ashurmatov (77)
PANAMA (U-17): 1. Jeym de Graciya, 2. Kristofer Bared (Stiven Santos 61), 3. Kevin Galvan, 5. Chin Xormechea, 6. Xesus Araya (S), 7. Elieser Domingez, 10. Ismoil Diaz, 11. Luis Kanate, 14. Verner Vald, 18. Ervin Zorrilla (Luis Zuniga 74), 19. Milsiades Molina
O'ZBEKISTON (U-17): 1. Sarvar Karimov, 2. Rustam Ashurmatov, 4. Akrom Komilov, 5. Odil Hamrobekov, 7. Jamshid Boltaboev, 9. Ibrohim Abdullaev, 11. Akobir To'raev (Shohjahon Abbosov 65), 15. Izzatilla Abdullaev (14.Islombek Karimov 89), 16. Ravshan Xursanov (Javohir Siddiqov 46), 17. Dostonbek Hamdamov, 20. Otabek Shukurov (S)
Bosh hakam: Daniel Bennet (JAR),
Referi assistentlari: Range Marva (Keniya), Sivel Zakxali (JAR),
Zahira hakami: Veysa Bamalku (Efiopiya)

the-uff.com: O'smirlarimiz Jahon chempionatini g'alaba bilan boshladi