- O'yin haqida

- Qiziqarli o'yin bo'ldi. G'alaba qozonsak ham bo'lar edi, lekin raqib ham yaxshi harakat qildi va g'alabani ilib ketishi mumkin edi. Reja qilgan ko'p ishlarimiz o'xshadi, o'xshamagan narsalar ham bor. Birinchi va ikkinchi golda yigitlar biroz yoshlik qilib qo'yishdi. Birinchi golda himoyachining yaqqol xatosi ko'rindi. Ikkinchi golda esa "jonli devor" xato qildi, jarima zarbalarida "jonli devor" hech qachon o'z joyidan qimirlamasligi kerak. Xatolarni ko'rib chiqamiz va analiz qilamiz. Umumiy qilib aytsak, yomon o'yin o'tkazmadik.

- Bosh hakam Temur To'xtasinov bugun "Olimpik" futbolchilarini yoshroq bo'lgani sabab, biroz boshqacharoq muomala qilgandek. Sizning ushbu holatga fikringiz qanday?

- Mening fikrimcha maydonda hamma teng, agar "Olimpik" jamoasinining yoshroqligini hisobga olsak, unda hakamlar bizga ko'proq yon bosishi kerak edi. Hakam har doim neytral. Maydonda kimdir yoshroq, kimdir kattaroq deb munosabat qilinishi kerak emas. Hakamlarni muhokama qilmayman, ularni nazorat qiladigan insonlar bor.

- "Olimpik" o'yinning birinchi daqiqalaridan o'yinga biroz tayyor emasdek ko'rindi, shu sababdan erta o'zgarish amalga oshirdingizmi?

- Yigitlar keragidan ko'proq ushbu o'yin haqida o'ylashayotgan edi va shu sababdan o'yin boshida ko'p xatolarga yo'l qo'ydik. Yosh futbolchilarda bunday holat bo'lib turadi. Men ularga xotirjamroq o'ynash kerakligini aytdim. Otamurodov esa o'yinga kirishib keta olmadi, avval penalti keyin yana bitta xatoga yo'l qo'ydi va shu sababdan uni zaxiraga oldim.

- "Olimpik" jamoasining hujum chizig'idagi kreativlik faqat Jaloliddinovda ko'rinmoqda. Hujumdagi rang-baranglik faqat bir futbolchiga bog'lanib qolayotgani noto'g'ri emasmi?

- Ha, Jasur juda kreativ futbolchi. Balki sizlarga shunday ko'rinayotgandir, lekin boshqa futbolchilar ham ancha yaxshi harakat qilishmoqda. Jasur ko'proq ko'zga tashlanayapti xolos.

- Joriy mavsum hakamlarning qarori o'yin natijalariga ko'p tasir o'tkazmoqda. Siz futbol o'ynagan davringizdagi hakamlik darajasi bilan hozirgi kundagi hakamlikni solishtirsak, qanchalik farq bor?

- Hakamlar tarkibi ham ko'p o'zgarmoqda. Hozirgi kunda yosh hakamlar soni ham ancha ko'paygan. Hakam xato qilmasligi kerak, lekin ular ham inson va xatoga yo'l qo'yishadi. Eski avlod hakamlarida tajriba katta edi, hozir ko'proq yosh hakamlar ishlashmoqda. Ular ham tajriba to'plab, xato qilmaydigan darajagacha etib kelishadi. Menimcha, hozir hakamlarga hozir osonroq, sababi VAR tizimi ishlab turibdi. Hozir hakam xatoga yo'l qo'ysa, VAR tizimi uni to'g'irlaydi.

Timur Kapadze: "Birinchi va ikkinchi golda yigitlar xatoga yo'l qo'yishdi"