- O'yin haqida

- Jamoamiz azolarini g'alaba bilan tabriklayman. Yigitlar juda yaxshi harakat qilishdi. Hujumchilar yaxshi ishlashdi, o'tgan o'yindan farqli tarzda ular vaziyatlardan unumli foydalanishdi.

"Bunyodkor" yaxshi jamoa, ularga qarshi qiyin o'yin bo'lishini bilardik. Shu sabab bu jamoaga qarshi jiddiy tayyorgarlik ko'rdik. Jamoamiz barcha o'yinlarda yaxshi harakat qilayotgandi, biroq vaziyatlardan foydalanish bo'yicha xatolarimiz bor edi. Bugun hujumchilar yaxshi ishlashdi va vaziyatlardan unumli foydalanishdi. Biz uchun juda yaxshi hisob bo'ldi.

- "Bunyodkor"ga qarshi qanday taktik uslublarni qo'lladingiz?

- "Bunyodkor" ishtirokidagi o'yinlarni ko'rib chiqdik, tahlil qildik. Ular "Neftchi"ga qarshi boshqacharoq uslubda o'ynashgandi, bugun boshqacharoq uslubni tanlashdi. Biz qisqa uzatmalar orqali o'yin tashkil etamiz. Ko'p jamoalar esa aksincha, uzun uzatmalar orqali o'yin tashkil qilishadi. Bunday xolatda ulardagi zaif nuqtalarni aniqlash qiyin. Biz qisqa uzatmalar orqali "Bundyokor"dagi bo'shliqlarni aniqlashga harakat qildik va buni uddaladik.

- "Olimpik" kuchli jamoalarga qarshi yaxshi o'yin namoyish etmoqda. Bunday o'yinlarda futbolchilarga boshqacharoq motivaciya berasizmi?

- Biz tanlab olgan yo'lning o'zi zimmamizga katta masuliyat yuklaydi. Yigitlar o'yindan o'yinga o'sib borishyapti, men aynan shu tomonlama xotirjamman. Kuchli jamoalarga qarshi o'yinlar jamoamizni yanada kuchaytiradi. Yaxshi o'yin tashkil etayotgan bo'lsak ham g'alaba yo'q edi. Bugun mana Superligada ham birinchi g'alabamizni qayd etdik. Bunday natijalar "Olimpik"ning to'g'ri yo'ldan borayotganidan dalolat beradi.

Timur Kapadze: "Biz tanlab olgan yo'lning o'zi zimmamizga katta masuliyat yuklaydi"