O'yin haqida

"Buxoro" bilan o'yindan so'ng bugungi o'yinga jiddiy tayyorgarlik ko'rgandik. "Sho'rtan"ni har tomonlama o'rganib chiqdik. Ular ham "Buxoro" klubiga mag'lub bo'lishgandi. Asror Aliqulovni yaxshi bilaman, u istedodli murabbiy. O'yinni qanday tuzishni, jamoani tayyorlashni yaxshi biladi. Bugun qizil kartochkalar ham bo'ldi, o'yin natijasiga bu o'z tasirini ko'rsatmasdan qolmadi. Bugun yigitlar yaxshi o'ynashdi, o'yinda tezkor gollar kiritishga muvaffaq bo'ldik. Bugungi g'alaba bilan barcha jamoamiz azolarini tabriklayman.

- "Sho'rtan" bosh murabbiyi bugun jamoangiz har tomonlama mahorat bobida ustun o'yin ko'rsatganini aytib o'tdi. Buni qanday uddaladingiz?

- Buning alohida siri yo'q. Tayyorgarlik jarayonida futbolchilarga tushuntirayapmiz, nazariy va amaliy mashg'ulotlar olib borayapmiz. Har bir o'yinga alohida yondashamiz va jamoani raqibdan kelib chiqib tayyorlaymiz. "Sho'rtan" hozir FIFA taqiqi tufayli qiyin vaziyatda. O'ylayman-ki, bu jamoa bilan hali hammasi yaxshi bo'ladi.

- Timur aka, ko'p yillar futbolchi sifatida o'ynagansiz. Tezkor gol jamoani ruhan tushkunlikka tushishiga sabab bo'ladimi?

- O'yin 90 daqiqa davom etadi. Gol urgan jamoada g'alabaga bo'lgan ishonch ortadi.To'p o'tkazib yuborgan jamoaga ruhan tasirini o'tkazmasdan qolmaydi. Balki bugungi g'alabamizga tezkor gol ham sabab bo'lgandir. Bugun "Sho'rtan"da xatolar ko'payib ketdi. Uchinchi goldan so'ng o'yin taqdiri deyarli hal bo'ldi.

- Pandemiya davrida bir jamoaga 5 nafar futbolchini almashtirish imkoni berildi. Keyinchalik yana 3 nafarlik ko'rinishga qaytildi. Sizningcha, buning qaysi biri yaxshiroq?

- Albatta 5 nafar futbolchini almashtirish imkoniyati qolgani yaxshi edi. Men o'zim O'zPFL rahbariyatiga ham bu borada fikrimni bildirdim. Jamoada o'ynayman deb turgan futbolchilar ko'p, 5 talik imkoniyat ko'proq futbolchiga o'yin amaliyoti berishga zamin yaratadi. Hozir 3 ta deymizu, aslida 2 ta desa ham bo'ladi. 2 nafar futbolchini o'yinni kuchaytirish maqsadida zaxiradan tushirasiz, lekin 1 nafar zaxira imkoniyatini oxirigacha saqlab turishingiz kerak. Kimdir jarohat yoki kartochka olsa majburiy o'zgarish uchun imkoniyatni o'yin oxiriga qadar saqlab turish lozim bo'ladi. 18 talik ro'yxatga kiritish ham ozgina o'ylantiradi. Chunki 23 nafar futbolchi bilan kelasiz, ulardan 5 nafari qaydnomaga kiritilmasdan qolishga majbur. Rasmiy o'yinlardan tashqari qaydnomaga kirmay qolgan futbolchilar bilan bo'sh jamoa topib nazorat o'yinlarini o'tkazayapmiz. Muhimi barcha futbolchilarning jismoniy holatini ushlab turishni maqsad qilganmiz.

Timur Kapadze: "PFLga futbolchilarni almashtirish borasida taklifimni bildirdim"