1975 yilning 26 dekabrida Namangan viloyatining Chortoq tumanida tug'ilgan Tohir Madrahimov futboldagi ilk saboqlarni chortoqlik taniqli murabbiy Abdullo Jo'raboevdan oldi.

Takidlash joizki, Zafar Musaboev, aka-uka Rashid va Mirzohid G'ofurov, Obid Jo'raboev, G'iyosjon Komilov, aka-uka Azam hamda Anvar Hafizovlar ham mazkur mutaxassisning shogirdlari hisoblanishadi.

Tohir Madrahimov futbolchilik faoliyatini 1991 yilda Xalqobodning “Sohibkor” jamoasida boshlaydi. Bir yildan so'ng esa viloyatning bosh jamoasi “Navbahor”ga taklif etiladi.

Aytish lozimki, ampluasi yarim himoyachi bo'lgan Tohir Madrahimov namanganliklar tarkibida jami 12 mavsum davomida o'ynab (1992 yilning 1-davrasi, 1993 yil, 1995 yilning 2-davrasi, 1996-2003 yillar, 2005 yil), jami 259ta o'yinda maydonga tushgan va 15ta gol muallifiga aylangan.

Shuningdek, mahoratli futbolchi “Navbahor”dan tashqari, “Navbahor-2” farm-klubi (1992 yilning 2-davrasi), Toshkentning MHSK (1994 yil - 1995 yilning 2-davrasi), Toshkentning “Lokomotiv” (2004 yil), bundan tashqari, Chortoqning “Neftchi” (2-liga, 2006-2008 yillar) jamoalarida ham to'p surgan.

1996 yili, yani “Navbahor” chempionlikni qo'lga kiritgan mavsumda Tohir Madrahimov 26ta uchrashuvda maydonga tushib, raqiblar darvozasiga 6ta to'p kiritgan hamda jamoaning oltin medalni qo'lga kiritishiga o'zining munosib hissasini qo'shgan.

Shuningdek, 2005 yili Namanganda “Neftchi”ga qarshi o'tkazilgan “vodiy derbisi” bahsida aynan uning goli evaziga “lochinlar” 1:0 hisobida g'alaba qozonganliklarini ham “Navbahor”ning ko'plab muxlislari yaxshi eslashadi.

"Navbahor"dagi yorqin o'yinlari tufayli O'zbekiston milliy terma jamoasiga jalb etilgan mahoratli yarim himoyachi milliy termamizda 5ta o'yin o'tkazgan.

Futbolchilik faoliyatini yakunlaganidan so'ng, Tohir Madrahimov murabbiylik sohasida o'z faoliyatini boshlaydi.

U Chustning “Paxtakor” (2011 yil), “Navbahor”ning o'rinbosarlar tarkibi (2012-2014 yillar), Uychining “Xotira-79” (2015-2016 yillar) jamoalariga murabbiylik qildi.

2016 yili “Navbahor” chempion bo'lganligining 20 yilligi munosabati bilan o'ziga xos futbol shousi tashkil etilib, unga 1996 yili chempionlik unvonini qo'lga kiritgan ko'plab futbolchilar taklif etilishgan hamda “Navbahor”ning o'sha paytdagi tarkib azolariga qarshi o'rtoqlik uchrashuvi o'tkazishgandi.

Jangovar durang, yani 4:4 hisobida yakunlangan o'sha o'yinda Tohir Madrahimov ham sobiq jamoadoshlari bilan birga maydonga tushgandi.

Afsuski, beshafqat o'lim Tohir Madrahimovni 2017 yilning 22 aprel kuni oramizdan olib ketdi.

Bugun uning vafot etganiga 3 yil to'ldi.

Namangan futboli va “Navbahor” tarixida o'ziga xos iz qoldirgan Tohir Madrahimovning xotirasi hamisha qalbimizda yashaydi.

“Navbahor” PFK matbuot xizmati.

Tohir Madrahimovni xotirlab...