Ушбу ҳакамнинг Ўзбекистон терма жамоалари ва клублари иштирокидаги қайси ўйинларида ишлаганини ёдингизга соламиз.

2008 йил Тошкентда ўсмирлар ўртасидаги Осиё чемпионати бўлиб ўтганди. Ўшанда Роберт Гай бошчилигидаги ўсмирларимиз гуруҳ босқичида Эронга 1:2 ҳисобида ютқазиб қўйишганди. Ўша мусобақада Эрон чемпион бўлганди, вакилларимиз эса чорак финалда тўхташганди.

2010 йил Гуанчжоуда бўлиб ўтган Осиё ўйинларида Аҳмад Убайдуллаев бошчилигидаги Ўзбекистон олимпия терма жамоаси гуруҳ босқичида БААга 0:3 ҳисобида ютқазганди. Чорак финалда эса Жанубий Корея 3:1 ҳисобида таслим қилинганди. Мана шу ўйинларда Минору бошчилигидаги ҳакамлар ишлашган.

2012 йил Аҳмаджон Мусаев бошчилигидаги Ўзбекистон ёшлар терма жамоаси БААдаги Осиё чемпионатини Вьетнамга қарши ўйин билан бошлаган. Япониялик ҳакам бошқарган ўйинда вакилларимиз 4:0 ҳисобида зафар қучишган. Ўша мусобақада Ўзбекистон ярим финалга қадар етиб борганди.

Ушбу ҳакам ишлаган яна бир ўйин бутун Ўзбекистон учун энг аламли ўйин сифатида тарихда қолган. 2013 йилнинг 11 июнь санасида Миржалол Қосимов бошчилигидаги Ўзбекистон миллий терма жамоаси Сеулда Жанубий Корея терма жамоаси меҳмони бўлган. ЖЧ-2014 саралаши доирасидаги баҳсда Ўзбекистон аламли автогол туфайли мағлуб бўлганди - 0:1.

Минору "Пахтакор"нинг ОЧЛдаги учта ўйинида ишлаган. 2010 йил гуруҳ босқичида "шерлар" ўз майдонларида Саудия Арабистонининг "Ал Шабаб" клубига 1:3 ҳисобида ютқазишганди. 2011 йил Тошкентда "Ал Наср" билан дуранг ўйналган 2:2 ва 2012 йил Жиддада "Ал Иттиҳод" меҳмони бўлиб 0:4 ҳисобида мағлуб бўлинган ўйинларда ҳам мана шу ҳакам ишлаганди.

Минору бошқарган яна бир ўйин 2012 йилда "Насаф" ва Эронинг "Истиқлол" клуби ўртасида бўлиб ўтган. Қаршида ўтган баҳсда "аждарлар" имкониятни бой бериб қўйишганди - 0:2.

Бу ҳакам "Локомотив" иштирокидаги битта ўйинда ишлаган. 2014 йил ОЧЛ плей-оффида "темирйўлчилар" Қувайтнинг "Қувайт СК" клубига 1:3 ҳисобида ютқазиб қўйганди.

Нарзулла Сайдуллаев

Тожо Минору биз учун қанчалик омадли ҳакам?