Яна бир неча кундан кейин Европанинг кучли чемпионатлари, шу билан бирга, ўзбекистонлик футбол мухлислари алоҳида эътибор билан кузатадиган Туркия Суперлигаси ҳам старт олади.

Хўш, ўзи топ чемпионатлар қачондан бошланади, унда қайси янги жамоаларни кўрамиз, грандлар янги мавсумга қандай тайёрланмоқда? Ушбу мақолада мазкур саволларга жавоб беришга ҳаракат қиламиз.

АПЛ

Бошланиш санаси: Англияда янги мавсум 15 август куни тунда "Ливерпуль" - "Борнмут" учрашуви билан старт олади.

Англия Премьер-Лигаси янги мавсуми ҳам одатдагидек қизиқарли бўлиши кутилмоқда. Бунга "Лидс", "Бёрнли" ва "Сандерленд" элитага қайтгани сабаб, десак муболаға бўлади, албатта. Амалдаги чемпион "Ливерпуль", нисбатан омадсиз мавсумдан кейин яна тахтга қайтиш ниятидаги "Манчестер Сити", йиллар давомида соврин умидида ҳаракат қилаётган ҳамда бу трансфер ойнасида айниқса фаол бўлган "Арсенал", таркибини анча тартибга солиб олаётган "Челси", янги футболчилардан ташқари янги мураббий билан юқорилашни кўзлаган "Тоттенхэм", сэр Алекс даврини қумсаганларни хурсанд қилиш умидидаги МЮ ва бошқалар мавсумга имкон қадар яхшироқ тайёргарлик кўрмоқда.

Трансферлар борасида гапирадиган бўлсак, нафақат АПЛ балки умумий олганда ҳам мазкур ойнанинг энг қиммат 3 ва 4-трансферларини МЮ амалга оширгани, бироз ҳайратланарли-а? Устига-устак гап Брайан Мбеумо ва Матэус Кунья ҳақида кетаётган бўлса. Аммо бу факт. "Ливерпуль" Флориан Вирц ва Уго Экитикени 125 млн ва 80 млн еврога харид қилган бўлса, манчестерликлар Мбеумо учун 75, "Вулверхэмптон" етакчиси учун эса 74.20 миллион евро тўлаб берди. Яна ўша "Transfermarkt" маълумотларига кўра, "Арсенал" Виктор Гьёкереш учун 65.80 миллион евро тўлаган. "Манчестер Сити"нинг энг қиммат хариди "Милан"дан Тижани Рейндерс бўлди — 55 миллион евро. Мавсум давомида, майдонда ким қимматлироқ футболчи бўлади, вақт кўрсатади.

Ла Лига

Бошланиш санаси: Испанияда янги мавсум 15 август санасида старт олади. Чемпионатнинг илк учрашувида жума оқшомида "Жирона" ўз уйида "Райо Вальекано"ни қабул қилади. "Барселона" 1-турни сафарда (16 августда) "Мальорка"га қарши бошласа, "Реал" турнинг охирги ўйинида (19 август) "Осасуна"ни меҳмон қилади. Ўтган мавсум бронза медали соҳиби "Атлетико Мадрид" "Эспаньол" меҳмони бўлади.

Ўтган мавсум якунларига кўра, қуйи дивизионга "Реал Вальядолид", "Лас-Пальмас" ва "Леганес" тушиб кетгани ёдингизда бўлса керак. Сегундадан эса Ла Лига чиққанлар — "Леванте", "Эльче" ва плей-офф орқали йўлланмани қўлга киритган "Реал Овьедо" клуби.

Трансфер бозорида фаоллик борасида бу мавсум инглизларга тенг келадиган йўқ, десак тўғри бўлса керак. Аммо испанлар ҳам керакли нуқталарга янги футболчилар харид қилмоқда. Мисол учун "Реал" "Ливерпул"дан Трент-Александер Арнольдни шартномаси якунига етишидан бир ой аввалроқ олиб кетиш учун 10 миллионнинг бахридан кечди. "Борнмут" ҳимоясида ўзини яхши томондан кўрсатган испаниялик Дин Хейсен 62,50 млн евро эвазига Мадридга кўчиб ўтди.

Кераксиз ўйинчилар билан хайрлашган "Барселона" эса Маркус Рэшфордни сотиб олиш ҳуқуқи билан ижарага олганини таъкидлаб ўтиш лозим.

Антонини таркибида сақлаб қолган "Бетис" 13 миллион еврога Кучо Эрнандесни ҳам сотиб олди.

Рубен Варгаснинг "Севилья"га трансфери сумма жиҳатидан (2.5 млн) бўлмасада, фойдалилик жиҳатидан эътиборга лойиқ, назаримизда.

А Серия

Бошланиш санаси: Италияликлар чемпионатни 1 ҳафта ўтиб бошлашга ҳаракат қилишган. 23 август санасида амалдаги чемпион "Наполи"нинг сафарда "Сассуоло"га қарши ҳамда "Женоа" - "Лечче" учрашувлари билан 2025/26-йилги мавсум старт олади. "Милан" ва "Рома" 23 августда, "Аталанта" ва "Ювентус" 24 август, "Интер" эса 25 август тунда майдонга тушади.

Ўтган мавсум якунларига кўра, қуйи дивизионга "Монца", "Венеция" ва Эмполи" тушиб кетгани ёдингизда бўлса керак. Б Сериядан эса А Серияга чиққанлар — "Сассуоло", "Пиза" ва плей-офф орқали йўлланмани қўлга киритган "Кремонезе" клуби. Эътиборлиси, "Пиза" 1990/91-йилги мавсумдан буён A Серияда бўлмаган. Шундай қилиб, жамоа 34 йиллик танаффусга чек қўйди.

Трансферлар борасида "Наполи" эркин агент сифатида Кевин Де Брюйнени, "Милан" эса Лука Модрични ўз сафига қўшиб олганини алоҳида таъкидлаш зарур. "Лацио" "Арсенал"да омади чопмаган Нуну Таварешни 5 миллион эвазига сотиб олгани, "Рома" Туркияга йўл олган ҳамюртимиз Элдор Шомуродов ўрнига "Брайтон"дан Эван Фергюсонни 3 млн.га ижарага олганини қўшимча қилиш мумкин.

Бундеслига

Бошланиш санаси: 22 август тунда амалдаги чемпион "Бавария" "РБ Лейпциг" билан баҳслашади. Хаби Алонсо тарк этган "Байер" ўз майдонида "Хоффенхайм"ни қабул қилса, ўтган мавсум ТОП-3ни якунлаб берган Франкфуртнинг "Айнтрахт" клуби "Вердер"ни меҳмон қилади. "Боруссия Дортмунд" сафарда "Санк-Паули"га қарши ўйнайди.

Ўтган мавсум Бундеслигадан "Бохум" ва "Хольштайн Киль" тушиб кетган бўлса, "Хайденхайм" плей-офф босқичида "Эльферсберг"дан устун келди ва ўз ўрнини сақлаб қолди. "Кёльн" ва "Гамбург" эса тўғридан-тўғри йўлланмани қўлга киритган ҳамда янги мавсум элитада ўз кучини синаб кўради.

Бундеслиганинг энг шов-шувли трансфери, шубҳасиз, Луис Диаснинг Мюнхенга кўчиб ўтиши бўлди. "Байер" икки, "Айнтрахт" эса битта етакчисини яхши пулга "Ливерпул"га сотган бўлса, "Бавария" "Ливерпул"дан Диасни 70 миллион евро эвазига сотиб олди.

Лига 1

Бошланиш санаси: Францияда янги мавсум Англия ва Испаниядагидек 15 августда старт олади. Очилиш учрашувида "Ренн" "Марсел"ни қабул қилади.

Ўтган мавсум якунида Лига 1ни "Монпелье", "Сент-Этьен" тарк этган бўлса, "Реймс" ўтиш ўйинларида "Метц"га имкониятни бой берди. Қуйи лигадан чиққан жамоалар: "Лорьян", "Париж" ҳамда "Метц". Пойтахтнинг "Париж" клуб 46 йил деганда элитага қайтишни уддалаб, тарихий воқеага сабаб бўлди.

Ижара муддати якунланган Пьер Эмиль Хойберг "Тоттенхэм"га қайтмайдиган бўлди ва "Марсель" бу сафар тўлақонли трансферни амалга оширди, Мамаду Саррни "Челси"дан ижарага олган "Страсбур", француз клублари ичида бозорда энг фаоллардан бўлиб турибди ва қатор трансферларни амалга оширганини айтиб ўтиш керак.

Бонус. Туркия Суперлигаси

Бошланиш санаси: Туркияда янги мавсум шу ҳафта старт олади! 8 август куни амалдаги чемпион "Галатасарой" сафарда "Газиантеп" билан беллашади. "Фенербахче" ўз уйида "Аланьяспор" билан рўбарў келса, сафида Элдор Шомуродов ва Аббос Файзуллаев бўлган "Истанбул" сафарда дебютант "Фатих Карагумрук" билан беллашади. Мазкур учрашув 10 август тунда 23:30да старт олади.

19 жамоа иштирок этадиган Туркия Суперлигасидан 4 та жамоа тушиб кетади. Ўтган мавсум якунларига кўра, "Адана Демирспор", "Хатайспор", "Сивасспор" ва "Бодрумспор"нинг омади чопмади. Биринчи лигадан эса чемпион "Кожаэлиспор", иккинчи ўрин соҳиби "Генчлербирлиги" ҳамда плей-офф босқичи ғолиби "Фатих Карагумрук" жамоаси олий лигага йўлланмани қўлга киритди.

Омонжон Тўхтамирзаев тайёрлади

ТОП-5 қачон бошланади? Жамоалар янги мавсумга қандай тайёрланмоқда?