Futbolga qiziqmaydigan qo'shnim Teshavoy aka ham ertasi kuni O'zbekistonning natijasini so'raydi. Raqib kim bo'lishining ahamiyati yo'q. Terma jamoa o'ynaydigan kuni bayram hisoblanadi. Bugungi g'alaba mamlakatimizda hukm surib turgan Navro'z va Ramazon ayyomiga qo'shaloq bayram bo'lishi aniq. To'y to'ydek bo'lsin, nima dedingiz? Biz esa mazkur o'yin oldidan ayrim malumotlarni etiboringizga havola qilamiz.

O'zaro o'yinlar

Bu ikki terma jamoa shu paytgacha 7 marotaba bir-biri bilan kuch sinashgan bo'lib, 4 ta o'yinda g'alaba, 3 ta bahsda durang natija qayd etilgan. O'zbekiston bu o'yinlarda 10 ta gol urgan va 3 ta to'p o'tkazib yuborgan. "Oq bo'rilar" o'z tarixida bu terma jamoaga mag'lub bo'lmagan. Mehmonda kechgan o'yinlarda vakillarimiz 1 durang va 2 g'alabaga erishgan. Jamoalar so'nggi bor 11 yil oldin Osiyo Kubogi-2015 saralashida to'qnash kelishgan.

Osiyo Kubogi saralash bosqichi. Javob uchrashuvi.

19.11.2013. Gonkong, "Mong Kok" stadioni. 5679 tomoshabin.

Gonkong - O'zbekiston 0:2

Hakam: Navaf Shukurulla (Baxrayn)

Gollar: Vohid Shodiev 84, Odil Ahmedov 89

O'zbekiston: Eldorbek Suyunov, Davronbek Hoshimov (Bahodir Nasimov,46), Anzur Ismoilov, Vitaliy Denisov, Odil Ahmedov, Aziz Xaydarov, Vohid Shodiev, Igor Sergeev (Server Jeparov, 82), Islom To'xtaxo'jaev, Sardor Rashidov, Jamshid Iskanderov (Shavkat Salomov, 74)

To'purarlar

Gonkongga qarshi kechgan uchrashuvlarda Anvar Soliev, Vladimir Shishelov 2 tadan gol urishgan. Qolganlar hisobida 1 tadan gol mavjud.

Vladimir Shishelov 2

Anvarjon Soliev 2

Azamat Abduraimov 1

Andrey Akopyanc 1

Nikolay Shirshov 1

Maksim Shackix 1

Vohid Shodiev 1

Odil Ahmedov 1

Himoyaga yotib olmaydigan Gonkong haqida

Gonkong Sharqiy Osiyoda joylashgan bo'lib, Xitoytarkibiga kiruvchi avtonom Respublikadir. U erga futbol 1914 yilda kirib borgan va oradan 40 yil o'tib, yani 1954 yili mamlakat futbol federaciyasi OFKga azo bo'lgan. Gonkong terma jamoasi o'z tarixida Osiyo Kubogi final bosqichida 4 marta - 1956, 1964 va 1968, 2024 yillarda qatnashgan. Gonkongliklarning Osiyo kubogidagi ilk ishtiroklari muvaffaqiyatli chiqib, turnirda 3-o'rinni qo'lgakiritishgan. Bu terma jamoa tarixidagi eng ulkan yutuq

hisoblanadi. Biroq 1968 yildan buyon raqibimizga biror bir nufuzli musobaqada qatnashish nasib etmayotgan edi. "Ajdaho"larni oradan 56 yil o'tib norvegiyalik Yorn Andersen qita kubogi sari etakladi. Ha, Gonkong termasi qitamizda katta obro'ga ega emas. Qolaversa, FIFA reytingida ham ancha pastki qatorlarda yuruvchi jamoasanaladi. Biroq har qanday raqibni hurmat qilish lozim. Ayniqsa bugungi kunga kelib tarkibni legionerlar bilan to'ldirgan, mahalliy futbolchilar tajribasini oshirayotgan terma jamoa yaxshigina bosh og'riq bo'lishi aniq. Zero tarixda raqibga etarlicha baho bermay ochko ulashgan vaqtlarimiz ham bo'lgan. Bunga 2006 yili guvoh

bo'lgandik. O'sha yili Osiyo Kubogi - 2007 saralash bosqichida milliy jamoamiz bilan bir guruhdan joy olgan gonkongliklar hamyurtlarimiz bilan Toshkent (2:2) va Syangan (0:0)da durangga imzo chekishganini qayd etish o'rinli. Toshkentdagi bahsda hamyurtlarimiz 2:0 hisobida oldinga chiqib olishgan, lekin biroz xotirjamlikka berilganlari natijasida yakunda o'z darvozalaridan 2 ta to'p o'tkazib yuborishgandi. Xayriyatki, yakunda hammasi omadli yakunlanib, termamiz qatarliklar bilan birga 2007 yilgi Osiyo Kubogiga yo'l

olgandi. Ko'pchilik bugun Gonkong himoyaviy o'yin ko'rsatishini taxmin qilyapti. Lekin Osiyo Kubogidagi o'yinlari orqali ko'rdikki jamoa chuqur himoyaga yotib olmaydi. Raqib 4-3-3 taktikasida harakat qiladi. Shuning hisobiga bugun O'zbekistonga nisbatan oson bo'lishi mumkin.

Gonkong terma jamoasi
Bosh murabbiy: Yorn Andersen
FIFA reytingidagi o'rni: 154
Asosiy formasi - qizil
Zaxiradagisi - oq
Dastlabki uchrashuvi: J.Koreya-3:3 (Filippin; 1954 yil 2 may)
Eng yirik g'alabasi: Guam-15:0 (Taybey; 2005 yil 7 mart)
Eng yirik mag'lubiyati: Xitoy-0:7 (Guanjou, Xitoy; 1980 yil 1 avgust), Xitoy-0:7 (Guanjou, Xitoy; 2004 yil 17 noyabr)
Osiyo chempionatidagi ishtiroki: 4marta (1956, 1964, 1968, 2024)
Eng yuqori natijasi: 3-o'rin (1956)

FIFA reytingida qancha ochko jamg'aramiz?

O'zbekiston terma jamoasi mehmonda Gonkongni yutish orqali +5.12 ishlab olishi mumkin. G'alabadan boshqa har qanday natija bizning zararimizga ishlaydi. Deylik bir ochko bilan qaytilgan taqdirda -7.38, mag'lubiyat uchun esa -19.88 yo'qotamiz.

Murabbiylar o'yindan oldin qanday fikrda?

"O'zbekistondek Osiyoning yirik jamoasiga qarshi raqobatlashishning yagona yo'li - Osiyo Kubogidagi kabi yuqori darajada o'ynash. Biz bor kuchimizni sarfladik, ko'p yugurdik va doimo kurashlarga kirdik.

Vaziyatga real qarash lozim, bunday terma jamoalarga gol urish qiyin. Gonkong chempionatida ko'p gol uradigan futbolchilarimiz bor, ammo bu daraja ancha qiyinroq.

Agar biz bir, ikki yoki uchta vaziyat yaratsak va omad bizga kulib boqsa, ulardan biri gol bilan yakunlanishi mumkin" - dedi Gonkong bosh murabbiyi Yorn Andersen.

"Gonkong terma jamoasi texnik direktori lavozimiga "Brayton"da ishlagan Jon Morling keldi. Yaqinda bizda ham huddi shu lavozimda belgiyalik Gi Kiala ish boshladi. Men terma jamoa haqida qayg'uraman, u esa yoshlarga javob beradi.

Men Iroq terma jamoasida ishlaganimda JCH-2022 saralashida Gonkongga to'qnash kelganman, o'shanda ular o'z yarim maydonidan chiqmay, faqat himoyada harakat qilishar edi. Yorn Andersen esa umuman boshqa jamoa shakllantiribdi. Ular hozir har bir o'yinda ko'plab vaziyatlar yaratishmoqda. Gonkong ko'p gol o'tkazyapti, ammo 5 kishi bo'lib hujumga o'tshmoqda" - dedi Katanec.

Ikki jamoaning mart oyidagi o'yinlarga jalb qilgan futbolchilar ro'yxati

To'y to'ydek bo'lsin. "Oq bo'rilar" "ajdaho" o'lkasidan o'lja bilan qaytadimi?