Ovoz berish yakunlariga ko'ra OKMK bosh murabbiyi Mirjalol Qosimov mart oyida Superliganing eng yaxshi murabbiyi deb topildi. Uning boshchiligida jamoa O'zbekiston chempionatining dastlabki uch turida uchta g'alabani qo'lga kiritdi, to'plar farqi 7:2 ni tashkil etdi. Hozirgi vaqtda OKMK Superligada peshqadamlik qilmoqda. Qosimov 47 foiz ovoz to'pladi, ikkinchi o'rinni 35 foiz bilan Vadim Abramov ("Dinamo"), uchinchi pog'onani esa 18 foiz ovoz bilan Ilyos Zeytullaev ("Bunyodkor") egalladi. Abramov va Zeytullaev jamoalari uch o'yinda ettitadan ochko to'plashdi.
Superliganing mart oyidagi eng yaxshi o'yinchisi "Bunyodkor" hujumchisi Luis Kachorri bo'ldi. Italiya fuqaroligiga ham ega bo'lgan 27 yoshli albaniyalik futbolchi uch turda to'rtta gol urib, 65 foiz ovozga ega bo'ldi. O'zbekiston chempionatining eng yaxshi to'purarlar ro'yxatida hozirda Kachorri peshqadamlik qilmoqda. Ikkinchi o'rinni uch o'yinda ikkita to'p kiritgan OKMK vingeri Nodir Abdurazzoqov (17 foiz) va uchinchi pog'onani uch o'yinda darvozasini daxlsiz saqlagan "Dinamo" posboni Ravshan Yagudin (12 foiz) band etdi.
Izohlar