Abdumalik Hakimov va Ilhom Zaylobidinov boshqaruvidagi jamoa ikkinchi bosqich bahslariga ham katta ishtiyoq bilan tayyorgarlik ko'rmoqda. Murabbiylar shtabi davralar oralig'idagi tanaffusdan unumli foydalangan xolda, tarkibga yangi futbolchilarni qo'shib olishni maqsad qilgan.

Xususan so'nggi yillarda “Buxoro” darvozasini qo'riqlab kelayotgan Farrux Turdaliev ayni damda quvasoyliklarning yig'inida bo'lib turibdi. Asli farg'onalik bo'lgan futbolchi, davralar oralig'ida buxoroliklar bilan xayrlashgandi.

Undan tashqari “Neftchi”ning yoshlar jamoasida o'ynab kelayotgan yarim himoyachilar Jahongir Dadaboev, Nodirxon Kamolov va Abdullajon Mirzaev ham “Cementchi”ga ijara asosida o'tdi.

Birinchi liga qatnashchisi “Kosonsoy”dan esa iqtidorli futbolchi Davlatbek Yorbekov ham bugungi kunda quvasoyliklarning mashg'ulotlarida qatnashmoqda. Shuningdek birinchi ligada “Qo'qon-1912” tarkibida xarakat qilgan va oxirgi paytlarda jamoasiz yurgan Davron Mamatov ham o'z omadini “Cementchi”da sinab ko'rishga ahd qilgan.

Yuqorida nomlari keltirib o'tilgan futbolchilar hozircha ko'rikdan o'tayotganini takidlash lozim.

Jamoa safini tark etgan futbolchilar ham yo'q emas. Sherdor Turonov, Asliddin Soipov, Asliddin Isroilov, Rustam Abduhamidov, Xojimurod Nasriddinov kabi futbolchilar bilan xayrlashildi.

Bugun “Cementchi” Farg'onada sinov-nazorat uchrashuvida maydonga tushdi. Farg'ona davlat universiteti stadionida (sobiq “Spartak”-muallif) ikkinchi liga qatnashchisi “Futbol-Info”ga qarshi kechgan o'yinda 2:2 hisobi qayd etildi.

Gollarga quvasoyliklardan Akmali Rahimzoda bilan Davlatbek Yorbekov mualliflik qilgan.

Islombek Rustambekov.

Turdaliev, Yorbekov, Kamolov va bir qator futbolchilar “Cementchi” yig'inida