- Dastlab o'yin haqida fikringiz?

- Uchrashuvni juda yomon boshladik. O'yinga diqqat etiborimizni qarata olmadik, agressiv futbol namoyish etmadik va ruhan tayyor emasdik. Buning sabablari nimada bilmayman. Buning ustiga tezkor gol o'tkazganimiz yomon tasir qildi. Asosiy tarkibda maydonga tushgan bir nechta futbolchimiz umuman kirishib keta olmadi. Xullas tushunarsiz narsalar ro'y berdi. Natijada tanaffus payti nimanidir o'zgartirishga harakat qildik. Ikkinchi taym "Qizilqum" chuqur himoyalandi, biz esa ko'proq hujumga o'tdik. To'p bir marta ustunga tegdi, yana bir vaziyatda bo'sh darvozaga kirib ketayotgan to'pni raqib o'yinchisi qaytarib qoldi. Agar durang bo'lganida adolatli bo'lardi. Lekin "Qizilqum" yutdi va ularni g'alaba bilan tabriklayman hamda keyingi o'yinlarga omad tilayman.

- Ikkinchi taymda Shahboz Jo'rabekov maydonga tushgach, jamoangiz o'yini kuchaydi. Bu futbolchini asosiy tarkibda tushirsa bo'lmasmidi?

- Bizda 23 nafar futbolchi bor va hammaning asosiyda o'ynagisi keladi. Biz esa barchani birdek ko'rib imkon berishga harakat qilyapmiz. Bazan sen futbolchiga imkon berasan, u esa bu imkoniyatdan foydalana olmaydi. Shuni sira tushunmayman. Shahboz - professional, u ikkinchi taymda tushgan bo'lishiga qaramay, jamoa foydasi uchun harakat qildi.

- Shohruz Norxonov bugun sobiq jamoasiga gol urdi.

- Unda vaziyatlardan foydalanish hissi yuqori. Bazan hech kim ko'rmagan joyda paydo bo'lib gol uradi. Men Shohro'zni gol urgani bilan tabriklayman.

- Aytib o'tganingizdek, ikkinchi taymda "Buxoro" ko'p hujum qildi, biroq darvozaga zarba berishga kelganda faqat bitta aniq zarba yo'lladi. Bundan go'yoki darvozaga zarba beradigan futbolchi jamoangizda yo'qdek ko'rinyapti.

- Siz yo'q deb aytdingizmi, demak yo'q. Chunki biz futbolchilarga doim zarbasiz gol bo'lmasligini aytamiz. To'pni hadeb uch-to'rt marta uzatgan bilan raqib ham 5-6 marta to'pga yaqinlashgan bo'ladi va senda gol urish imkoniyati kamayib ketadi. Vaziyat bo'ldimi, tepish kerak. Buni ko'p bora takidlaymiz. Lekin futbolchilar eshitishni xohlamayapti yoki ular tepishni bilmayapti.

- O'zingiz o'ynagan paytda ko'p gollar urardingiz. Yoki u payt himoyachilar bo'lmaganmi?

- Albatta, u vaqtlarda ham yaxshi himoyachilar bo'lgan. Lekin hujumchilar ham vaziyat topib gol urgan. To'g'risi, hozirgi holatimizni bir so'z bilan ifodalash qiyin.

Ulug'bek Bakaev: "Agar durang bo'lganida adolatli bo'lardi"