"Bellashuv qiyin bo'lishini bilardik, chunki "Qo'qon-1912" Superligaga yo'l olish uchun asosiy davogarlardan biri sanaladi. Shu bois, o'yinga jiddiy tayyorgarlik ko'rdik.

O'yin shuni ko'rsatdiki, ikkala jamoa ham g'alaba qozonishi mumkin edi. Durang ham bo'lishi mumkin edi. Ammo biz raqib darvozasini ishg'ol qildik va himoyada tartibli o'yin namoyish etdik. Yigitlarga minnatdorchilik bildirmoqchiman. Fursatdan foydalanib, O'zbekiston xalqini kirib kelayotgan Navro'z bayrami bilan tabriklayman.

Biz G'uzorda gol urishimiz mumkin edi. O'tkazib yuborgan vaziyatlarimiz ham bo'ldi. Bugun ham shunday holat kuzatildi. "Sho'rtan" ham, "Qo'qon-1912" ham o'z taktik sxemasida o'ynaydi. Har bir murabbiyning o'z taktikasi, falsafasi, qarashlari bor. Ikkala raqibni solishtirganda, "Qo'qon-1912" ko'proq yoqdi, ular yuqori darajadagi jamoa. O'ylaymanki, ular o'z oldiga qo'ygan maqsadiga erishadi.

O'tgan mavsum quyi ligaga tushib ketdik. Bundan ko'rinadiki, jamoamiz kuchsiz edi. Joriy yil klub rahbariyati Superligaga chiqish vazifasini qo'ygan. O'ylaymanki, har bir o'yinga intizom bilan yondashib, har bir raqibni hurmat qilib, fidoyilik ko'rsatib, xalqimiz, “Buxoro” muxlislari va rahbariyat oldidagi vazifalarni uddalaymiz.

O'g'lim O'zbekiston terma jamoasiga chaqirilishi mumkinmi? Amir hozirda Belarusda o'ynaydi. Terma jamoa safiga kirish uchun har kimda imkoniyat bor. Barchasi fidoyilikka, sabr-toqatga, mehnatga bog'liq. Agar inson harakat qilsa, mehnatsevar va sabrli bo'lsa, omad hamisha u tomonda bo'ladi. Har bir futbolchi terma jamoada o'ynashni xohlaydi, biroq bu hammaga ham nasib etavermaydi. Eng muhimi, terma jamoamiz o'z oldiga qo'yilgan vazifani uddalagan holda jahon chempionatiga yo'l olishi hisoblanadi", dedi buxoroliklar ustozi.

Ulug'bek Bakaev: "O'g'lim terma jamoaga chaqirilishi mumkinmi? Barchada imkoniyat bor"