Матбуот анжуманида дастлаб "Бухоро" бош мураббийи Улуғбек Бақоев иштирок этиб ўз фикрларини билдирди.

- Ўйин тўғрисини айтсам, қийин кечди ва буни ўйиндан олдин футболчиларга ҳам айтгандим. Биз рақибни ўрганиб чиққандик. "Обод" жадвалда охирги ўринда тургани билан ҳар бир очко учун курашмоқда. Ғалаба учун йигитларга ва шунча йўл босиб Бухородан келган мухлисларга ўз миннатдорчилигимни билдираман, - дейди Улуғбек Бақоев.

- Иккинчи давранинг "Бухоро" учун бошланишини қандай баҳолайсиз?
- Ижобий. Ҳозирча учта ўйинда етти очкони қўлга киритдик ва бу биз учун яхши кўрсаткич.

- "Бухоро" бу йил кучли учликка кира оладими?
- Ҳозирча бу ҳақда ўйлаётганимиз йўқ. Лекин ҳар бир баҳсда фақат ғалаба учун курашяпмиз. Мавсум охирида кўрамиз, нечанчи ўринда бўлишимизни. Ҳозирда ҳар бир рақибни ҳурмат қилган ҳолда майдонга чиқяпмиз.

- Жамоангизнинг сафардаги ўйини уйдагидан фарқ қиладими?
- Уйда бизни кўплаб томошабинлар қўллаб туришади. Мухлислар Бухорода ҳақиқий 12-ўйинчи вазифасини бажариб беришади. Сафардаги ўйинларда эса маҳорат эвазига тўп тепамиз.

- Бугун иккинчи голни ўтказиб юборгач учинчисини ўтказмасак бўлгани деган хавотир бўлдими?
- Бундай хавотир доим бўлади. Шу боис йигитларга доим охиригача кураш кераклигини уқтирамиз.

- Ўзингиз ҳам футболчи бўлгансиз. Футболчиларни рақибни менсимасликка ўргатишнинг иложи борми?
- Албатта, кўпчилик рақибга қараб ўйнайди. Бугунги ўйинда бизда ҳам 20 дақиқача шундай ҳолат бўлди. Билмадим бу нима билан боғлиқ.

- Кўплаб мухлислар Иван Нагаев нима учун терма жамоага чақирилмаяпти деган саволни беришади. Бу борада сиз нима дея оласиз?
- Менинг терма жамоа мураббийлари ишига аралашишим яхши эмас. Лекин холис фикримни билдирадиган бўлсам, Нагаев ҳам терма жамоага лойиқ футболчи. Ҳар ҳолда имконият берилса ўзини кўрсата олади.

- Сизнингча, ҳозирги кунда Ўзбекистоннинг энг кучли ҳужумчиси ким?
- Яхши ҳужумчилар бор, лекин бир текис ўйнаш осон эмас. Ҳамманинг футболда ўз даври бўлади. Аммо кимнидир алоҳида мана шу зўр ҳужумчи деб ажратиб кўрсата олмайман.

Х.Холиқов.

Улуғбек Бақоев: "Нагаев терма жамоага лойиқ футболчи"