Ushbu uchrashuvdan so'ng jamoa bosh murabbiyi Ulug'bek Baqoev fikrlarini bildirib o'tdi.

Baqoev: - Birinchi bo'limda biroz zerikarli o'yin bo'ldi. Raqib bizning xududimizda ko'proq to'pni nazorat qilishga harakat qildi. Tezkor gol urib olganimiz hisobiga tanaffusga yaxshi kayfiyatda yo'l oldik. Ikkinchi bo'limni uchta o'zgarish bilan boshladik. Bundan ko'zlangan maqsad barcha futbolchilarga imkoniyat berishdir. Bugungi natijani jangovar durang desak mubolag'a bo'lmaydi. "Bunyodkor"ga keyingi uchrashuvlarda omad tilayman. Xuddi shu omad bizga ham kerak.

-"So'g'diyona" avvalgi o'yinlarda ikkinchi bo'limni sustroq o'tkazayotgan edi. Bugun Jasur Hasanov va Shohruz Norxonovning zaxiradan maydonga tushishi oldindan o'ylangan taktika edimi?

- Jamoada 20 nafar futbolchi bor. Har bir futbolchi o'yin amaliyotini his qilishini taminlashimiz lozim. Bu orqali ularni ko'rib olamiz. Kubok bahslari murabbiylarga shuning uchun ham foydali. Ayrim etakchilarga hordiq chiqarish imkonini berdik.

- So'nggi turda raqib Birinchi liga vakili "Rubin"ning darajasidan kelib chiqib tarkibda katta o'zgarishlarga qo'l urasizmi?

- Biz har qanday raqibni hurmat qilamiz. U qaysi ligada ishtirok etishi ahamiyatsiz. Faqat g'alaba uchun maydonga tushamiz.

- Faoliyatingizda burilish yasash imkoni tug'ilib poytaxt klublaridan biridan taklif tushsa qanday qaraysiz?

- Qachonki taklif bo'lsa o'ylab ko'rishim mumkin. Hozircha taklif bo'lmadi.

Abdulaziz Iskandarov yozib oldi

Ulug'bek Baqoev Toshkent klublaridan birini boshqaradimi? Murabbiy ishtirokidagi matbuot anjumani