Урганч шаҳар ҳокимлиги, “Соғлом авлод учун” халқаро хайрия жамғармаси вилоят бўлими, Ўзбекистон "Миллий тикланиш" демократик партияси Урганч шаҳар ташкилоти, Урганч шаҳар халқ таълими муассасалари фаолиятини методик таъминлаш ва ташкил этиш бўлими, “Камолот” ёшлар ижтимоий ҳаракати Урганч шаҳар кенгаши ва Футбол федерацияси Урганч шаҳар бўлими ҳамкорлигида “Таянчим ва суянчим, фахру ифтихоримсан, муқаддас Ватан!” шиори остида ўтказилган мазкур мусобақада 30 та мактаб жамоаси иштирок этди.

Ҳал қилувчи учрашувда Урганч шаҳрининг 5-сонли ва 7-сонли умумтаълим мактаблари жамоалари ўзаро баҳс юритди. Ушбу ўйинда Зоҳиджон Иброҳимов устозлик қилаётган 5-сон мактабнинг ёш “чарм тўп” усталари рақибидан анча маҳоратли эканлигини исботлади. Улар рақиб жамоасини 6:1 ҳисобида мағлубиятга учратиб, Урганч шаҳар ҳокими кубогини қаторасига бешинчи марта қўлга киритишди. Натижада, 7-сонли мактаб жамоаси шоҳсупанинг иккинчи поғонасини эгаллади. Урганч туманининг 2-сонли ва 12 - сонли мактаб футболчилари учинчи ўринга лойиқ кўрилди.

Мусобақанинг “энг яхши”лари номига Жасур Саъдуллаев(дарвозабон, Урганч тумани 2-сон мактаб), Сирож Тожиев(ҳимоячи, Урганч тумани 12-сон мактаб), Ҳабибулла Матёқубов(ҳужумчи, Урганч шаҳри, 5-сон мактаб) ва Зоҳиджон Иброҳимов(мураббий, Урганч шаҳри, 5-сон мактаб)лар сазовор бўлди.

Якунда ғолиб ва совриндор жамоалар ҳамда номинациялар бўйича “Энг яхши”лар ташкилотчилар томонидан тегишли даражадаги диплом ва совғалар билан тақдирланди.

Икром ХУДОЙБЕРГАНОВ,

Урганч шаҳар ҳокими кубоги соҳиби аниқланди