Tajribali o'yinchi dastlabki taassurotlari bilan o'rtoqlashdi.

- Vagiz “Andijon” klubiga qaytganingizdan xursandmiz. Qachondir shunday bo'lishi kerak edi. Buning asosiy tashabbuskori kim bo'ldi?

- Ha, “Andijon”ga kelganimdan juda xursandman. Tashabbuskoriga kelsak, bu vaqt bo'lishi kerak. Qachondir uyga qaytaman, “Andijon”da o'ynayman deb o'ylab yurardim. Bu erda dadam bor, oshna-og'aynilarim bor. Har doim ketaman deb niyat qilardim. Endi shunaqa vaqt bo'ldiki, men uyga keldim.

- Jamoa bilan Toshkentdagi yig'inda ishtirok etyapsiz. Moslashish qanday? Dastlabki taassurotlaringiz bilan o'rtoqlashsangiz.

- Toshkentdagi yig'inni boshlab oldik. Moslashish hammasi yaxshi. Yigitlar bilan tanishib oldim. Kimlar bilandir bungacha ham tanish edim. Mashg'ulotlar orqali bir-birimizni tushunib boryapmiz. Yanada moslashish uchun mana shunday mashg'ulotlar va o'yinlar kerak.

- Rossiyadagi uzoq yillik faoliyatingiz yakuniga etdi. U erda chempionlik, Kubok va Superkubok sohibi bo'ldingiz. Barcha o'ylaganlarim amalga oshdi, deb ayta olasizmi?

- Rossiyada ko'p yillar davomida o'ynadim. Hammasi ham amalga oshdi, deb ayta olmayman. Bundan ham zo'r o'ynasam bo'lardi. Lekin ko'p narsalar xalaqit qilgan. Ayniqsa, jarohatlar to'sqinlik qilgan. Superkubokda, Kubok finalida o'ynaganman. Rossiya chempioni bo'ldim, “Rubin” bilan. Ammo, baribir bundan ham yaxshiroq natijalar bo'lishi mumkin edi. Masalan, Evropani boshqa chempionatlarida to'p surishim ham mumkin edi.

- Bu erda o'zingiz uchun qaysi raqamni tanladingiz?

- Hozircha o'zim uchun raqam tanlamadim. Hali bu to'g'risida o'ylamadim. Chunki hozir tezroq sport formasiga qaytish uchun yig'inda mashg'ulotlar bilan bandman.

- Siz maqsad va vazifalarni bajargan futbolchisiz. “Andijon”dagi asosiy maqsadingiz nima?

- Asosiy maqsadim “Andijon” futbol klubiga yordam berish. To'plagan tajribam bilan yigitlarga maydonda va maydon tashqarisida og'zaki bo'lsa ham yordam berish. Bu erga faqat yordamlashish uchun qaytdim. Vazifam maksimal ravishda “Andijon” bilan hamma o'yinlarda g'alaba qozonish. Xudo xohlasa, Kubokni qo'lga kiritish niyatim bor.

- O'zbekiston chempionatini kuzatib borayotgandirsiz. Qanday o'zgarishlarni ko'ryapsiz?

- O'zbekiston chempionatini kuzatib borardim, “Andijon”ga ham etibor qaratardim. Do'stlarim to'p surishadi. O'zgarishlar bor, yaxshi tomonga. O'zbekiston Superligasi saviyasi Rossiya birinchi divizionidan ancha yuqorilab ketdi. Terma jamoada ham boshqacha o'yin ko'rsatishyapti. O'zbek futbolchilari Evropa chempionatlarida va Osiyoning kuchli ligalarida to'p surishyapti. Asosiysi, o'zbek chempionati rivojlanyapti.

Vagiz Galiulin: “O'zbekiston Superligasi saviyasi Rossiya birinchi divizionidan ancha yuqorilab ketdi”