Unga ko'ra, "Atletiko" va "Marsel" turnir g'olibligi uchun kurash olib boradi.

Bilasiz, bu mavsumdan keyin Arsen Venger o'z postini tark etadi. Shu boisdan "Arsenal" uzoq yillik murabbiyini xursand qilib jo'natishni niyat qilgandi. Biroq bunday bo'lmadi. Xo'sh, nima uchun "Arsenal" mag'lubiyatga uchradi?

3. "ARSENAL" TO'P BILAN KO'P BO'LDI, BIROQ KREATIVLIK ETISHMADI

Qachonki bir jamoa to'pni o'zida ko'p ushlab tursa, ular ko'proq vaziyat yaratishi kerak, aslida mantiq shunday. To'pni o'zida ushlab turish - g'alaba degani emas. Yarim finalning ilk uchrashuvi esa "Arsenal" uchun saboq bo'lishi kutilgandi. Jamoa 76 foiz vaqt davomida to'p bilan bo'ldi, yakunda durang bilan kifoyalandi. Safardagi uchrashuvda 55 foiz vaqt davomida to'p bilan harakatlanishdi. Ammo birinchi o'yin jamoa uchun dars bo'lmagani ko'rindi.

Bahs davomida "Arsenal" oldida yo'llar paydo bo'lgandi, biroq "kanonirlar" kreativlikdan qochishdi. Mehmonlar ko'proq vaqtni hujumda o'tkazgan bo'lsa-da, vaziyatlar yarata olishmadi. Statistikaga qaraydigan bo'lsak, "Arsenal" butun bir 90 daqiqalikda birgina aniq zarba yo'llay olganining guvohi bo'lamiz.

Hatto Mxitaryan va O'zilda ham g'oyalar etishmadi. "Arsenal"ning to'p bilan muomalasi jamoa uchun foydaga xizmat qilmadi.

2. MUDOFAADAGI XATOLIKLAR

Birinchi o'yin natijasidan keyin "Arsenal"ni falokat kutayotgani aniq edi. Himoyadagi kichik muammolar sababli o'yin durang bilan yakunlandi. Grizmann jamoasining yaratgan kam sonli vaziyatlaridan birini samarali yakunlagandi.

"Vanda"da esa "kanonirlar" bir bor zarba berishdi, ilk bahsdagi kabi ko'plab vaziyatlarga ega bo'lishmadi. To'pni ko'p ushlab turgan bo'lishsa-da, raqib "Atletiko" ko'proq hujum qildi va "Arsenal"ning himoyasidagi muammolarni ko'rsatib berdi. Shunda ham madridliklar faqatgina bir gol kirita olishdi.

Grizmann sherigi Diego Kostaga pas bergan vaziyatda Mustafi va Belerinning o'rtasida "katta yoriq" bor edi. Grizmann bundan ustalik bilan foydalandi. "Yoriq" tufayli darvoza ishg'ol etilguncha Kostaga hech kim qarshilik ko'rsata olmadi. Aslida Nacho Monrealning tanlagan poziciyasi katta xatolik bo'lgandi. Yakunda shunday kichik yoki katta detallar o'yin taqdirini hal qildi.

1. RAQIB JARIMA MAYDONIDAGI NOANIQLIKLAR

"Arsenal" raqib jarima maydonigacha etib borsa ham, "quti"ning ichida ko'p bora noaniqliklarga yo'l qo'ydi. Vaziyatni muvaffaqiyatli yakunlash uchun variantlar etarlicha bo'lgandi.

5-daqiqadayoq shunday voqeaning guvohiga aylandik. O'shanda Lyakazet qanotdan jarima maydonchasi ichiga to'p oshirib berdi. Ammo to'pni darvozaga kiritadigan futbolchi topilmadi. Oradan ko'p vaqt o'tmasdan Monreal jamoadoshi Chembersdan to'pni qabul qilib oldi, biroq u eng yomon variantni tanladi: Lyakazetga to'pni aniq etkazib bera olmadi. Ayrim pallalarda franciyalik futbolchiga raqib himoyachilari imkoniyat bermadi, bazi paytlarda esa londonliklarning o'zlari noto'g'ri qaror chiqarishdi. Bahs davomida "Arsenal" ko'plab noaniqliklarga yo'l qo'ydi. Shu boisdan jamoa g'alabaga loyiq o'yin ko'rsatmadi.

Mirjalol Normatov tarjimasi

Vengerga nasib etmadi yoxud "Arsenal" mag'lubiyatining 3 sababi