Uchrashuvdan keyin mezbonlar murabbiyi Vesko Steshevich taassurotlari bilan o'rtoqlashdi.

"Bugun qimmatli ochkolarni boy berganimizdan xafamiz. Biz o'yinni yaxshi boshlamagan bo'lsak ham dastlabki daqiqalardayoq gollik vaziyat yaratdik. Ammo O'rinboev qulay imkoniyatdan foydalana olmadi.
Shayqulov chetlatilib, bir kishi kam bo'lib qolganimizdan keyin futbolchilarimiz uyg'onishdi. Raqib futbolchisi ham qizil olib, tarkiblar tenglashganidan keyin esa o'yinni biz nazorat qildik.
Penaltidan gol urishimiz kerak edi. Afsus, undan ham gol urish nasib qilmadi. Ubaydullaevda yaxshi vaziyat bo'ldi, u raqib darvozaboni bilan birga-bir vaziyatga chiqib borgandi. O'ylashimcha, bugun biz 2 ochko yo'qotdik.
Elitadagi o'rnini saqlab qolish uchun kurashayotgan jamoalarga qarshi o'yinlar doim qiyin bo'ladi. Nazarimda, raqib to'pni bizga berib qo'yib, biz birinchi raqam bo'lib o'ynashimiz talab etilganda muammolarga duch kelyapmiz. Albatta, bu vaziyatni tahlil qilib, o'rganib chiqamiz", - dedi Vesko Steshevich.

Vesko Steshevich: "Bugun biz 2 ochko yo'qotdik"