- Chempionat oxiriga yaqinlashgani sari ko'ryapmizki, o'yinlar taqdiri so'nggi daqiqalarda hal bo'lyapti. Kechagi uchrashuvlarda ham ko'rdik, Olmaliqda ham, Toshkentda ham shunday holat kuzatildi. Bugun biz ham so'nggi daqiqalarda urilgan gol evaziga g'alaba qozondik. Umuman olganda, o'yin teng kurashlar ostida kechdi. Biz hujum uyushtirgan pallalarda “Metallurg” darvozaboni jamoasini qutqardi, qaysidir vaziyatlarda mehmonlar xavfli hujumlar tashkil etishdi. Lekin yigitlar o'zlarini yaxshi tomondan ko'rsatishdi. Ayniqsa, zaxiradan maydonga tushganlar o'yinga tezda kirishib ketishdi, tezlikni oshirishdi, hujumlarga keskinlik bag'ishlashdi. Mahmudhojiev gol urishi mumkin edi, lekin o'sha vaziyatda darvozabon yaxshi o'ynadi. Bosimni oshirish evaziga penalti ishladik. Bugun jamoamizning g'alabasi adolatli bo'ldi, - dedi Viktor Jalilov.
- “Metallurg”ga ochko juda zarurligini inobatga olsak, uchrashuvning qiyin kechishini oldindan bilganmidingiz?
- Bu yil turnir jadvalining quyi qismidagi barcha jamoalar bilan o'yinlarimiz og'ir kechmoqda, ularga qarshi bahslarda ko'p ochko yo'qotdik. O'sha ochkolarning hech bo'lmaganda yarmini olganimizda, hozirgi o'rnimiz yanada yuqoriroqda bo'lardi, ehtimol. Afsuski, vaziyat shuni taqozo etdi.
Izohlar