Muxlislar Karpenkoning “Bunyodkor” safidagi o'yinlarini yaxshi eslashadi. Aynan u birinchi bo'lib “qaldirg'ochlar” tarkibida 200dan ziyod rasmiy o'yin o'tkazgan futbolchi bo'ldi.

Hozirgi paytda Karpenko hisobida 205ta uchrashuv bor. Undan 170tasini u asosiy tarkibda boshlagan. Viktor “Bunyodkor” libosida raqiblari darvozasini 38 marotaba ishg'ol qilgan. Bu borada u Anvarjon Soliev va Rivaldodan ortda qolmoqda xolos. Karpenko hamon ishonchli va saviyali futbol o'ynashda davom etmoqda.

Uning “qaldirg'ochlar” oilasiga qaytishi muxlislarda turli xil fikrlarni keltirib chiqardi: kimdur tajribali futbolchining “Bunyodkor”ga qaytganidan xursand, bazilar esa “fahriy” futbolchining yosh jamoaga qaytishini yaxshi tushunib etmadi.

Tomonlar bir-birlari bilan yana qanday til topishdi? Biz klub raxbariyati, bosh murabbiy va futbolchining bu boradagi fikrlari bilan qiziqdik.

Baxtiyor Boboev, “Bunyodkor” FK bosh direktori: Viktor Karpenko jamoamiz uchun juda ko'p mehnat qilgan futbolchilardan hisoblanadi. U jamoadoshlari bilan bir qancha sovrinlarni qo'lga kiritgan. Viktor futolchilik faoliyatini tugatish arafasida. Katta futboldagi uzoq yillik faoliyati mobaynida Karpenko boy tajribaga ega bo'lgan. Bunday ulkan tajribasi bor yigitlarni jamoamizda ishlashini va o'zbek futboli rivoji uchun o'z hissasini qo'shishini istaymiz. Viktor Karpenko futbolchilik faoliyatini yakunlaganidan keyin ham jamoa uchun xizmat qilishda davom etadi.

Sergey Lushchan, bosh murabbiy: Viktor hali futbolchi sifatida “Bunyodkor”ga foyda keltiradi. Biz u bilan gaplashib oldik. Uni vaziyatga qarab, imkoniyatdan kelib chiqib maydonga tushiramiz. Karpenkoning tajribasi yuqori, haqiqiy professional. Bundaylar mashg'ulotlar davomida jamoadagi boshqa futbolchilarning o'sib ulg'ayishida namuna bo'ladi.

Viktor Karpenko: “Bunyodkor” – men uchun qadrdon klub. Bu erda futbolchi sifatida ajoyib yillarni o'tkazganman. “Bunyodkor” bilan bir necha bor chempion bo'ldik va kubok sohibiga aylandik, shuningdek Osiyo Chempionlar ligasida ham muvaffaqiyatli qatnashdik. Bir qancha afsonaviy futbolchilar bilan birga to'p tepdim. Boshqa jamoalarda o'ynab yurgan kezlarimda ham “Bunyodkor”ga befarq bo'lmaganman. Jamoa o'yinlariga kelardim, raxbarlar va futbolchilar bilan suxbatda bo'lardim. Qadrdon klubimga qaytganimdan juda-juda xursandman. “Bunyodkor”ning muvafaqiyatlari uchun qo'limdan kelganicha hissa qo'shishga tayyorman.

Viktor Karpenko: “Taqdirim “Bunyodkor” bilan bog'langan”