O'yin haqida

- Og'ir o'yin bo'ldi. Har ikkala jamoa ham g'alabani xohladi. Bugun yangi stadionni ochilishi bo'lgani uchun mezbonlarga bayramdek edi. Shuning uchun yutishni xohlashdi. Biz barchasini uzil-kesil hal qilishimiz uchun yana ikki o'yinni yutishimiz kerak edi. Mana, bittasini yutdik. Endi uydagi o'yinda g'alaba qozonsak, vazifani hal qilgan bo'lamiz. Shu o'rinda futbolchilarga rahmat. Asosiy tarkibimizdagilar to'liq o'ynashmadi. Bugun o'yin amaliyoti etarli bo'lmaganlarga imkoniyat berdik. 3 tadan sariq kartochkasi bor futbolchilarni asradik. Bugun maydonga tushganlar vazifani to'liq bajarishdi. Asosiysi, g'alaba qozondik.

- Jamoangiz birinchi davrada Urganchda yirik hisobda yutqazgandi. O'shanda nima bo'lgandi?

- Birinchi davrada Urganchda yutqazganimizni sababi, yarim "sutka" avtobusda qiyinchilikda kelgandik. Bundan tashqari, 3 nafar legionerlarimizga ruxsat berilmagandi. Tarkibni aniqlab bo'lganimizdan so'ng ularga o'ynashga ruxsat berishdi. Bu erda obektiv va subektiv sabablari bor edi. Shuning uchun mag'lub bo'lgandik. Mana shunday sabablar ham bugungi bahsda g'alaba qozonishimiz uchun qo'shimcha "stimul" bo'ldi.

- “Andijon” vazifani bajarishga yaqin turibdi. O'z ishingizni qanday baholaysiz?

- Xudo xohlasa to'liq 100 foiz hal qilganimizdan so'ng baho beramiz. Yaqin kunlarda hal qilamiz. Shunda rahbariyat bizni ko'rsatgan natijalarimizni baholab xulosa berishadi. O'z-o'zimizni baholashimiz to'g'ri emas.

- "Andijon" bilan Superligada ham ishlaysizmi?

- Yana bir oy davomida o'yinlar bor. Bu mavzuda hali gaplashmadik. Dekabr oxiriga qadar shartnomam bor.

Viktor Kumikov: "Yaqin kunlarda hal qilamiz"