O'yin haqida

- O'yin yaxshi kechdi. Ikki jamoa ham g'alaba qozonishni istadi, ammo qaerdadir, nimadir etishmadi. Shu sabab ham durang adolatli bo'ldi deya olaman.

- Ramazon oyidan keyin futbolchilarning sport formasida biroz tushish sezildi. Chunki, jamoa ochko yo'qotyapti, oxirgi daqiqalarda gol o'tkazib yuboryapti. Futbolchilarning jismoniy holati bo'yicha muammolar bormi?

- Biz Ramazon oyida ham ochko yo'qotdik, oxirgi daqiqalarda gol o'tkazib yubordik. Hamma gap psixologiyada. Qachonki gol ursangiz, hayolingizda g'alaba haqida o'ylashni boshlab yuborasiz. Muammo aynan shunda. Oxirgi soniyalargacha o'ynash kerak. Shunda umuman muammo bo'lmaydi. Aynan shu ustida ishlash kerak.

- "Neftchi" katta kuch bilan hujumga bordi va katta kuch bilan himoyalandi. Qarshi hujumlar orqali natijaga erishishni maqsad qilganmidingiz?

- Albatta, raqib o'yinini o'rganib chiqamiz va qaysi yo'llar bilan g'alabaga erishishni analiz qilamiz. Bugun ham bunga harakat qildik, ammo har doim ham bu o'xshayvermaydi.

- O'tkazib yuborilgan ikki gol ham himoyaning xatosimi?

- Ha, xatolarsiz bo'lmaydi. Xato qilyapmiz, ayniqsa, o'yin oxirida. Koncentraciyani yo'qotyapmiz.

- Bu kamchilik ustida ishlanmoqdami?

- Albatta. Ishlayapmiz, ammo hali bu muammodan qutila olmayapmiz. Uchta o'yinda oxirgi daqiqalarda xato qilib, ochko yo'qotyapmiz.

- "Surxon" murabbiyi Sergey Aslanov sizni juda yaxshi taktik murabbiy deb atadi. Siz "Surxon" o'yinida qanday yaxshi yoki yomon jihatlarni ko'rdingiz?

- "Surxon" anchagina yosh jamoa. Tezligi yuqori bo'lgan futbolchilarga ega va shu sabab ham tezkor futbol o'ynaydi. Kuchli pressing qilishga urinadigan jamoa. Umuman olganda, jamoa tezkor futbol ko'rsatadi. Biz bu narsani o'rgandik va "Surxon"ga bo'sh zonalar bermaslikka harakat qildik. Sababi, ular bu imkoniyatdan foydalanib ketishardi.

- Murod Bobojonovda jarohat bormi?

- Yo'q, Bobojonovda jarohat yo'q. Futbolchilarning jismoniy ko'rsatkichlarni tekshiradigan Catapult tizimi bor. Aynan shu tizimdagi ko'rsatkichlarga ko'ra Bobojonov hozircha asosiy tarkibdan joy ololmayapti.

- Lutfullo To'raevning jamoaga tasirini qanday baholaysiz?

- Tajribali futbolchi, jamoa sardori. Har bir o'yinda u ko'proq o'yin amaliyoti olib, o'z formasini tiklashiga umid qilaman. Biroz vaqt kerak bo'ladi. To'raev o'zining eski formasiga qaytishi uchun unga vaqt va o'yin amaliyoti kerak bo'ladi.

Vitaliy Levchenko: "Oxirgi daqiqalarda koncentraciyani yo'qotyapmiz"