Vitaliy Levchenko: O'yin derbi nomiga mos bo'ldi. Derbilarda chetlatishlar bo'lishi odatiy hol. Qizil kartochkagacha boshqacha, undan keyin boshqacha o'yin ko'rdik. Atayin orqaga qaytdik va hisobni ushlab turishga harakat qildik. Shu sababli "Andijon"da vaziyatlar ko'p bo'ldi, darvozabonimizga qoyil qolish kerak, butun jamoadan minnatdorman.

- Toma Tabatadze ko'pincha vaziyatlardan foydalana olmayapti.

- Balki shoshayotgandir, balki ruhiy qiyinchiliklar bordik. U o'ziga kelib, tinchlanib olsa, hammasi joyiga tushib ketadi. Bizda unga nisbatan etiroz yo'q. U jamoamizning muhim futbolchilaridan biri.

- Nurillo To'xtasinov bugun qizil kartochka oldi. Bu jamoa uchun katta yo'qotishmi?

- Ha, yo'qotish. Istalgan etakchi futbolchi maydonga tushmasa qiyinchiliklar sodir bo'ladi, ammo uning o'rniga munosib futbolchi bilan to'ldirishga harakat qilamiz. Tanaffusda kartochkasi borlar ehtiyot bo'lib o'ynashi kerakligi aytilgan edi. U hissiyotlarga berilib ketdi.

- Kubok o'yinlarida tarkibda rotaciya bo'ladimi?

- Albatta. Bunday taqvimda kam o'yin amaliyotiga ega bo'layotgan futbolchilarga imkon beriladi. Ikkita tarkibga egamiz.

- "Andijon"da to'p tepayotgan sobiq shogirdingiz Axtam Nazarov O'zbekiston chempionatiga ko'nikib ketdimi?

- Uning o'yiniga baho bermoqchi emsaman. Chunki "Andijon"ning o'z murabbiyi bor. Agar u tarkibda bo'lsa, demak murabbiyning talablariga javob bermoqda. Uni Tojikiston chempionati orqali yaxshi bilaman. Nazarov sifatli futbolchi.

- Bugungi g'alabani kimga bag'ishlaysiz?

- Doim g'alabani muxlislarga bag'ishlaganmiz. Ulardan minnatdorman. Klub rahbariyatiga ham rahmat aytish kerak deb o'ylayman.

Vitaliy Levchenko: "Tanaffusda kartochkasi borlar ehtiyot bo'lib o'ynashi kerakligi aytilgan edi"