Vladimir Ashotovich Safarov - O'zbekiston futboli tarixchisi va "Paxtakor"ga oid barcha muhim voqealarini qayd etib boruvchi inson edi.

U jazmen, jurnalist, yozuvchi va o'zbek futboli tarixchisi sifatida mashhur inson sanalar edi. U tashkil etgan "Arcax" jaz guruhi O'zbekistondagi arman madaniy markazi nomidan xalqaro festivallarda qatnashardi. Turli mamlakatlardagi OAVda uch mingdan ortiq maqolalari chop etilgan, O'zbekiston futboli tarixi va statistikasiga oid o'ttizga yaqin kitoblar muallifi hisoblanadi. Shuningdek, bir qator mashhur futbolchilar va futbol klublari haqida kitoblar yozgan.

Vladimir Ashotovich o'zi to'plagan statistik malumotlarni "Rossiya futbolining yuz yilligi" va "Futbol sayyorasi" kitoblari yaratilish uchun taqdim etib kelgan. Estoniyada chop etilgan "Mustaqil davlatlar futboli", Ukraina-Rossiyada omma etiboriga havola qilingan "Statistika to'plami" kitoblari uchun O'zbekiston futboli statistikalarini yig'ib bergan. 2000 yil O'FF tomonidan yilning eng yaxshi jurnalisti sifatida tan olingan. "O'zbek futboli enciklopediyasi" ham aynan Safarov tomonidan yaratilganini takidlab o'tamiz.

Vladimir Ashotovichning kitoblari orasida eng mashhurlari quyidagilardir:

Paxtakor. Unutib bo'lmas uchrashuvlar... (1990), Paxtakor. 40 yilga cho'zilgan o'yin (1995), Aka-uka An futboli (2002), Xotira qanotlari. "Paxtakor-79" aviahalokati hujjatli xronikasi (2004), O'zbek futboli afsonasi: Birodar Abduraimov (2009), Hamid Rahmatullaev – o'zbek Pelesi (2011), Bahodir Ibrohimov: Futbolga baxshida umr (2013), Igor Shkvirin. Hujumchi odisseyasi (2014), Rahim Mo'minov. Futbolga baxshida umr (2015).

Championat.asia sayti Vladimir Safarovning yaqinlariga chuqur hamdardlik bildiradi. Sizni unutmaymiz Vladimir Ashotovich!

Vladimir Safarov vafot etdi