Mazkur uchrashuvdan so'ng jamoaning tajribali himoyachilaridan biri Vladislav Kasmininga bir nechta savollar bilan yuzlandik.

- Jamoaning mavsumdagi ilk uch ochkosi bilan tabriklaymiz. Dastlab o'yin haqidagi fikrlangiz bilan o'rtoqlashsangiz?

- Avvalo muxlislarimizga ajoyib muhit yaratishgani uchun rahmat aytaman. Turnir jadvalidagi poziciyamizga qaramasdan ular doim biz bilan birga. Jamoani doim olg'a boshlashadi. Shuningdek jonkuyar rahbarlarimizga minnatdorchilik bildirib qolaman. Bevosita o'yinga to'xtaladigan bo'lsak, ajoyib uchrashuv o'tkazdik. Uyushqoqlik va tartib-intizomga amal qilgan holda o'z maqsadimizga etdik, deb o'ylayman. Birinchi bo'lim qiyinroq o'tdi. Oddiy vaziyatlarda xatolarga yo'l qo'ydik. Raqib gol urib ketishi ham mumkin edi. Penaltini aniq amalga oshirish evaziga hisobda oldinga chiqib oldik. Ikkinchi bo'lim esa "Metallurg"ning ustunligida o'tdi. Biz esa qarshi hujumlarda keskinlikni oshirishga intildik.

- Igor Shkvirin jamoani qabul qilib olganiga ko'p bo'lmadi. Lekin ko'rdikki uning qo'l ostidagi ikkinchi o'yindayoq natija o'xshadi. Murabbiy qisqa vaqt ichida jamoada nimani o'zgartirdi?

- Jamoada shu paytgacha ishlagan Islom Ismoilov, Baguslav Baniak o'zlarining hissalarini qo'shdilar. Igor Anatolevich bizni ko'proq xotirjamlikka chaqirdi. Boisi uning o'zi vaqtida futbolchi bo'lgani uchun futbolchilarning ruhiyatini juda yaxshi tushunadi. Bu omil o'yinchilar uchun juda muhim hisoblanadi. Qolaversa mashg'ulot jarayonida o'zgarishlar yuz berdi. Tinimsiz qilingan mashqlar o'z samarasini bermay qolmadi.

- Shu vaqtga qadar "Turon"ga etishmayotgan narsa bitta g'alaba edi. Boisi o'yin borasida raqiblaridan qolishayotgani yo'q edi...

- Bilasizmi shu vaqtgacha biz juda yaxshi o'yin ko'rsatayotgan edik. Faqat ayrim bahslarda omadimiz kelmayotgandi. Men hakamlarning xatolari va boshqa narsalar haqida gapirmoqchi emasman. Ular ham inson va xato qilishdan kafolatlanmagan. Futbolchilar maydonga chiqishi va natija qayd etishi kerak. O'tgan o'yinlarda yuta olmayotganimiz sabab biz qandaydir "o'ra"ga tushib qolgandik. Qaysidir manoda o'ziga hos tajriba ham oldik, deya olaman. Umid qilamanki, endilikda hammasi boshqacha bo'ladi. Birinchi uzoq kutilgan g'alaba bilan muxlislarimizni va klubdagi barchani tabriklayman. Bu g'alaba bizga juda zarur edi.

- Bo'ydor va jismoniy jihatdan baquvvat ekanligingizni hisobga olsak, Igor Shkvirinning uslubiga mos kelishingizni ko'rishimiz mumkin. O'z vaqtida ushbu mutaxassis AGMKdagi faoliyatida sizning tipingizdagi legionerlar xizmatidan foydalangan...

- To'g'risini aytganda men o'sha vaqtda O'zbekistonda bo'lmaganman. Agar shunday bo'lsa, men uchun yaxshi (kuladi).

Abdulaziz Iskandarov suhbatlashdi

Vladislav Kasminin: "Turon"ga bitta g'alaba juda zarur edi"