Klub rahbariyati tomonidan O'zbekistonda xizmat ko'rsatgan sport ustozi va “Sevinch”ni yuqori natijalar orqali nafaqat mamlakatimizda balki, xorijda ham tanitgan, tajribali mutaxasis Xan Vladislav Nikolaevich yana klub bosh murabbiyliga taklif etildi.

Bugun klub murabbiylari va ishchi-xodimlari ishtirokida yig'ilish bo'lib o'tdi. Yig'ilishda klub prezidenti SH.CH. Aslanov shaxsan o'zi ishtirok etdi va klub rahbariyati qarorini elon qildi. Shunday qilib, Xan V.N. bugundan “Sevinch” klubiga bosh murabbiylik qiladi. Shuningdek unga klubni boshqarish vazifasi ham topshirildi. “Sevinch” jamoasi oldiga o'z mavqieni tiklash va hamisha chempionlik uchun kurashish vazifasi ham qo'yildi.

Bungacha bosh murabbiy bo'lib ishlagan B.M. Norsafarov o'z hohishiga ko'ra, istefoga chiqarildi. Jamoa murabbiylar shtabida boshqa o'zgarish bo'lgani yo'q.

“Sevinch” jamoasi yangi mavsum tayyorgarligiga 10 yanvar kunidan kirishadi. Shu kundan jamoa o'z qarorgohi – “Geolog” sport majmuasida yig'iladi va mashg'ulotlarni boshlaydi. “Sevinch” klubida tashkiliy jihatdan ham o'zgarishlar bo'ladi.

Vladislav Nikolaevich Xan yana “Sevinch” bosh murabbiyi