“Нефтчи”: Шерзод Ҳакимов уйланмоқда

Фарғоналиклар келаётган якшанба куни ўз майдонида “Олмалиқ”ни қабул қилади. Бўлажак баҳсга жамоа жиддий тайёргарлик кўрмоқда. 8 июнь куни ҳужумчи Шерзод Ҳакимовнинг никоҳ тўйи. Унга футболчилар муносиб совға сифатида навбатдаги турда ғалаба тақдим этмоқчи. “Олмалиқ” билан ўйинларнинг бошланиш вақти маълум бўлди. Унга кўра, 6 июнь куни Қиргулидаги “Нефтчи СК” стадионида кечадиган “Нефтчи” – “Олмалиқ” ёшлари ўртасидаги баҳс 17:30да старт олса, 7 июнь куни олий лига доирасидаги баҳс “Истиқлол” стадионида соат 18:00да бошланади.

“Навбаҳор”: Жамоа бугун йиғилади

Режага кўра футболчилар айни пайтда клуб қароргоҳига етиб келмоқда. Ўтган турда майдонга тушмаган Аъзам Алиев, Дилшод Жабборов ва яна ёшлар жамоасидаги бир қатор футболчилар кеча ёрдамчи мураббийлар бошчилигида машғулот ўтказишди. Бугундан Бахтиёр Ашурматов машғулотларга ўзи бошчилик қилади. “Навбаҳор”нинг ҳам навбатдаги ўйинини бошланиш вақтлари маълум бўлиб улгурди. Клуб матбуот хизматининг айтишича, 5 июнь куни ёшлар лигасининг 12-туридан ўрин олган “Навбаҳор” – “Бухоро” учрашуви Тўрақўрғондаги “Ёшлик” стадионида соат 17:00да бошланади. Олий лига ўйини эса 6 июнь куни Наманган шаҳридаги “Марказий” стадионда 18:00да старт олади.

“Қўқон-1912”: “Металлург” билан ўйинга астойдил тайёргарлик кўрилмоқда

Қўқонликлар навбатдаги турни сафарда аниқроғи, Бекободда “Металлург”га қарши ўтказади. Бўлажак баҳсга жамоа аъзолари пухта тайёргарлик кўрмоқда. Таркибда айтарли йўқотишлар йўқ. “Металлург” ёшларига қарши баҳс 5 июнь куни “Анохин” номли стадионда 17:30да бошланса, 6 июнь куни эса олий лига учрашуви “Марказий” стадионида 18:00да бошланиши режалаштирилган.

“Андижон”: Асрор Раҳмонов “Сўғдиёна”га қарши баҳсни ўтказиб юборади

Ўтган турда “Нефтчи” билан ўйинда ҳакам томонидан иккинчи маротаба сариқ карточка билан огоҳлантириб, майдонни шерикларидан олдин тарк этишга мажбур бўлган Асрор Раҳмонов энди дисквалификация туфайли навбатдаги баҳсни ўтказиб юборишга мажбур. Эслатиб ўтамиз, андижонликлар мазкур турни 6 июнь шанба куни сафарда “Сўғдиёна”га қарши ўтказади.

"Водий футболи". Шерзод Ҳакимов уйланмоқда. “Навбаҳор” бугун йиғилади