- O'yin qiyin bo'ldi. Gol bo'lgan vaziyatda o'zimiz xato qildik. Darvozabonimiz to'pni ushlay olmay qoldi va himoyachilarning tartibsiz harakatlari evaziga to'p darvozamizga kirib ketdi. Shundan keyin ham jamoamizda ko'plab vaziyatlar yuzaga keldi. O'ta qulay imkoniyatlardan foydalana olmadik, hatto "jinni to'p" ham darvozaga kirishni istamadi. Biroq shuni ko'rdimki, yigitlarda o'sish bor, o'yindan o'yinga harakatlari kuchaymoqda.

- Qizil kartochka va hakamlik borasida nimalar deya olasiz?
- Agarda hakamlar bizni "o'ldirib" tashlaganida aytardim. Ularga hech qanday etirozim yo'q. Qizil kartochka ham haqli berildi. Bugun hakamlar o'yinni yaxshi boshqarishdi. Ammo ayta olamanki, keyingi uchrashuvdan oldin katta yo'qotishga uchradik. Farruh Shotursunov - jamoa etakchisi. Uning atrofida o'yinni qurayotgandik. Endi keyingi bahsda, "Labsa"ga qarshi uy uchrashuvimizda Farruhsiz ham o'ynay olishimizni ko'rsatamiz.

- Ushbu uchrashuvda jamoangizning eng yaxshi futbolchisi deb kimni ayta olasiz?
- Bugun himoyachimiz Abdurasul Komilov yaxshi o'yin namoyish etdi. Umuman olganda, Shotursunovni ham, Murod Rajabovni ham eng yaxshilari deb ayta olaman. Biroq bugun Abdurasul har doimgidan ham ishonchli o'yin ko'rsatdi.

- Jamoadagi muammolar qanday?
- Bizda o'yin sifati ham yaxshi. Yigitlar barqarorlikni namoyish etishmoqda. Deyarli barcha uchrashuvlarda ustunlikka ega bo'lyapmiz. Muammo shundaki, biz vaziyatlardan foydalana olmayapmiz.

- Birinchi davra yakunlandi. Ilk davradagi eng qiyin o'yin deb qaysi uchrashuvni ayta olasiz?
- Safardagi uchrashuvlar unchalik qiyin o'tmayapti. Yuqorida aytganimdek, deyarli barcha uchrashuvlarda tashabbusni ushlab tura olyapmiz. "Zomin"ga qarshi o'tgan o'z maydonimizdagi bahs birinchi davradagi eng qiyini bo'ldi deya olaman. O'shanda juda qiynalgandik. 1:0 hisobida g'alaba qozona turib, gol o'tkazib yubordik. Ketma ket vaziyatlar yaratib ham, raqibni qamal holatiga solib qo'yib ham raqib darvozasini ishg'ol etishni uddalamagandik.

- "Nurafshon"da moliyaviy holat qanday? Bu loyiha keyingi mavsumda yo'qolib qolmaydimi?
- Xudo xohlasa, bunday bo'lmaydi. Ayni damda barchasi joyida. O'tgan yili jamoa Asqar Jadigerov, Davlet Ilyasov boshqaruvida munosib qatnashdi va ligada birinchi o'rinni egallashgan edi. Bu mavsumda esa aynan ular "Nurafshon"ning Pro-ligada qatnashishida bosh-qosh bo'lishdi. Shuningdek, Toshkent viloyati hokimi o'rinbosari Ahmedov Bahodir Madjitovich hamda klubning moliyaviy masalalarini hal etishda baholi qudrat yordam berayotgan Rustamov Odiljon Bakievichga o'z minnatdorligimni bildiraman. Ular va yana bir qancha insonlar tufayli Toshkent viloyatida yaxshi jamoa shakllandi. Ikkinchi davrada ham shunday o'yin namoyish etib, "B" guruhida birinchi o'rinni egallab, "A" guruhiga yo'llanma olishni o'ylayapmiz.

Umuman olganda, barchasi dastur asosida kechmoqda. Shunday insonlar klubni tashkil qilishdi va jamoaning rivojlanishi uchun barchasiga tayyor. Umid qilaman, jamoa uzoq yillar davomida yo'qolib qolmaydi.

Mirjalol Normatov suhbatlashdi

Vohid Xolboev "Nurafshon"dagi muammoni aytdi