Аслида Анчелоттининг кетиши ҳақидаги гап-сўзлар ва унинг ўрнига ким келиши борасидаги тахминлар анча олдин янграшни бошлаганди. Шунчаки ПСЖга қарши ўйиндаги натижа ва асосий таркибдан етакчиларни тушиб қолгани Ули Хёнессни қишгача мураббийга индамаслик фикрини тезда ўзгартирди.

Анчелотти нега истеъфога чиқарилди?
Ҳаммаси мавсумолди йиғинлар доирасидаги ўртоқлик ўйинларидаги натижалардан кейин бошланди. Хитойдаги турнеда "Бавария" "Ливерпуль", "Милан", "Интер" ва "Наполи"га умумий ҳисобда 11:0 ютқазди. Бу эса клуб имижига тўғри келмасди. Аммо раҳбарият барчани тинчлантирди ва бу шунчаки янги мавсумга тайёргарлик жараёни эканлиги айтилди.

Нафақат натижа, балки жамоанинг бир хил услубда, яъни битта қолипга тушиб қолган ўйини футболчиларни энсасини қотирди. Немис матбуоти эса Анчелоттига танқид тошларини ота бошлади.

Ули Хёнесс ва Румменигге эса Анчелоттининг захира кучи янги мавсумга етишига ишонди. Раҳбарият Анчелоттини жамоани қайта қураётганини инобатга олиб, унга шартномаси сўнггига қадар имконият беришни кўзлади.

"Бавария" Анчелотти учун трансфер бозорида янги харидларни амалга оширди. Себастьян Руди ҳамда Никлас Зюле клуб президенти Ули Хёнесснинг хоҳиши билан жамоага келган бўлса, Толиссо ва Хамес Родригез Анчелоттининг истаги билан "Бавария"га олиб келинди.

Ўтган йили ёзда катта пуллар эвазига жамоага сотиб олинган Ренату Саншешга эса Анчелотти мавсум давомида умуман имконият бермади. Саншеш эса ўйин амалиётисиз қолиб кетмаслигини истагани раҳбарият португалиялик иқтидор эгасини "Суонси"га ижарага берди.
Барчаси Анчелоттининг хоҳиш ва истакларини инобатга олиб амалга оширилди.

Лекин мавсум бошланиши билан футболчилар ва мураббий ўртасида бир қатор келишмовчиликлар, низолар пайдо бўлди. Бу эса жамоанинг ўйини ва натижаларига ҳам бевосита таъсир кўрсатди. Анчелотти ўтган йили қилмаган ишини, яъни ротацияни мавсум бошидан қўллади.

Футболчилар Анчелоттининг машғулотларидан анча зерикишганди. Чунки Карло Анчелотти майдонга чиқиб келгунга қадар футболчиларга машғулотлар кўрсатмасини унинг ёрдамчилари ва 28 ёшли ўғли берарди. Бу эса жамоанинг етакчи футболчиларига ёқмасди. Анчелотти нафақат машғулотлар назоратини қўлдан чиқарди, балки футболчилар билан ишлашда ҳам хатоликларга йўл қўйди. Назорат тўлиқлигича йўқотилди.

Анчелотти қўл остида Левандовски матбуотда оғзига келганини гапиришни бошлади, Рибери захирага олинганида жаҳл қиларди, Мюллер эса Анчелоттининг ўйин услубини тушунмаётганини бот-бот такрорлади. Анчелотти эса табиатдан анча хотиржам инсонлиги учун ҳаммаси ўз-ўзидан изига тушиб кетишига ишонди. Аммо "Бавария"да ҳеч кимга шавқат қилинмайди. Буни Луи ван Галл, Клинсманн, Магат ёки Гвардиола жуда яхши билади.

Бу клубда натижадан ҳам кўра жамоавий муҳит, унинг қоидаларига тўлиқ риоя этиш муҳимроқ.
Анчелотти "Хоффенхайм"дан учралган мағлубиятдан кейин матбуотда мавсум якунланганидан кейин барча танқидчиларни йиғиб, базм уюштиришини ва ўша кечада футбол тактикалари ҳақида соатлаб суҳбатлашишини ваъда қилди.
Унинг бу гапларидан кейин Мюнхенда барча танқидчиларни сиғдирадиган жой топишда Карло Анчелоттига қийин бўлиши тахмин қилинди.
Аммо бунга ҳожат қолмади.

Парижга сафар олдидан жамоа ўз уйида ишлари юришмаётган "Вольфсбург" қаршилигини енга олмади. Тайёр ғалаба қўлдан чиқарилди. Бунга сабаб мураббий ротацияни тўғри амалга оширолмагани бўлди.
Бу орада эса Анчелотти ҳар ўйинда таркибда камида 3-4 ўзгаришни амалга ошириб, ротация қилишда давом этди. Энг қизиғи, Анчелотти қўл остида фақатгина Левандовски рақобатдан холи қолди. Ротация ҳам Левандовскини асосий таркибдаги ўрнини қимирлатмади. Тўғри, ҳужум чизиғида Левандовскига рақобат туғдирадиган номинал ҳужумчи йўқ. Аммо Анчелотти Мюллерни жойини аниқлай олмаётган бир пайтда Томасдан марказий ҳужумчи сифатида фойдаланиб Левандовскига рақобат вужудга келтирмади.

Мураббий ротацияни керакли тарзда амалга оширолмади. Яъни таркибдаги баланс йўқолди. Чизиқлар ўртасидаги боғлиқликлар кесилди. ПСЖга қарши ўйинда эса Рибери, Роббен, Боатенг ва Хуммельс асосий таркибга киритилмади. Ули Хёнессга ПСЖга қарши муҳим ўйинда Карло Анчелотти "Ferrari"ни (Рибери) "гараж"да қолдиргани ёқмади.

Анчелоттининг бу ғалати ишлари клуб раҳбариятининг истеъфо ҳақидаги қарорни қабул қилишида энг муҳим омилга айланди.
Ули Хёнесс қишгача кутишни истамади. Роббери ҳамда ҳимоя қурғонининг энг асосий вакиллари Хуммельс ва Боатенгни муҳим ўйинда захирада қолиши Анчелоттига "қизил" чироқни кўрсатди. Мураббийнинг бу иши ва ПСЖнинг ғалабаси клуб раҳбариятига мураббийни истеъфога чиқиши ҳақидаги қарорни қабул қилишида "яшил" чироқ вазифасини ўтаб берди.

Биргина мағлубият билан ҳаммаси тугамасди. Анчелотти бундеслигадаги 3-ўринни нафақат мавсум якунига қадар, балки қишгача биринчи ўринга алмаштириши ва ЕЧЛда гуруҳдан чиқиш вазифасини бемалол уддалаши мумкин эди. Аммо унинг қайд этган натижаларидан ҳам кўра, жамоанинг ички муҳитида пайдо бўлган келишмовчиликлар ва муаммолар Карло Анчелоттининг истеъфосига бош сабаб бўлди.
Рибери, Роббен, Боатенг, Хуммельс ва Мюллер каби футболчилар билан ўзаро муносабатни бузилиши Анчелоттининг истеъфо йўлидаги дастлабки қадами бўлганди.

Анчелотти дастлабки мавсумида "Бавария"даги "норматив"ни яхши топширганди. Яъни Бундеслигада чемпион бўлишни уддалаганди. Аммо ЕЧЛдаги муваффақиятсизлик ва Германия кубогида бош соврин қўлга киритилмагани маълум сабаблар туфайли амалга ошмаганди. Ҳакамлар фактори (бу энди бошқа мавзу) ва ўшандан кейинги жамоанинг руҳий ҳолати инобатга олиниб, Анчелоттига яна ишонч билдирилганди. Мавсум бошида эса жамоани қайта қуриш вазифаси турганлиги учун ҳам Анчелоттига ЕЧЛни қўлга киритиш бош вазифа этиб белгиланмади. Аммо мураббий ортиқча талофатларсиз авлодлар алмашувини амалга ошириши лозим эди.
Анчелоттининг ёши катта футболчилар билан ишлаш тажрибасидан келиб чиқиб ҳам Ули Хёнесс Карлога ишонганди. Лекин "қария"лар билан ишлашни дўндирадиган Карлонинг ўзи мураббий сифатида анча "қариб" қолгани кўринди.

Шу сабабдан ҳам Анчелоттининг истеъфосини ўз вақтида амалга оширган "Бавария" жуда тўғри қарор қабул қилди.
Бу муҳитда ишлаш Анчелоттига ҳам, "Бавария" учун ҳам яхши оқибатлар олиб келмасди.

Эски фалсафа
"Бавария" эйфорияси 2012/2013 йилги мавсумга тўғри келди. Клуб президенти Ули Хёнесснинг дўсти Юпп Хайнкес ўшанда жамоа билан ўзининг охирги мавсумида даҳшатли натижа қайд этганди. Юпп "Бавария" билан барча мусобақаларда ғолиб чиқди. Ўйин жиҳатидан ҳам "Бавария" идеал футбол намойиш этди. Юпп Хайнкес жамоада аввалига ажойиб муҳитни шакллантирди. Кейинчалик жамоанинг ўйинлари аста-секинлик билан куздан-қишгача яхшиланиб борди ва мавсумнинг энг асосий қисмида, яъни баҳорда "Бавария" оч қолган "бўри"дек олдидан чиққан рақибларини "ғажиб" ташлади.

Юпп Хайнкес ўшанда таркиб борасида ҳам бир меъёрни сақлаб турди. Ротация ўз вақтида ва кераклигича амалга оширилди. Трансфер ойнасида биргина катта харид амалга оширган Юпп Хави Мартинесдан максимум унумли фойдаланди. Асосий таркибдаги барча 20 футболчи ўйин амалиётига эга бўлди ва деярли барча ўйинларда жамоа йирик ҳисобидаги ғалабаларни тантана қилди.

Юпп жамоани кучини тўғри тақсимлай олган ҳолда барча натижаларга эришди. Ўшанда таркибда Марио Гомез, Томас Мюллер, Клаудио Писарро, Марио Манжукич каби марказий ҳужумчилар ўйнарди ва барчаси 25дан ортиқ ўйинда иштирок этиш билан бирга самарадорлик бўйича ҳам ҳавас қиларди натижа кўрсатганди.

Барча совринларни қўлга киритган "Бавария"дан ўшанда Юпп Хайнкес ва клуб президенти Уи Хёнесс ҳам кетишга мажбур бўлди. Клуб президенти ўшанда солиқлардан бўйин товлагани учун 3 йил муддатга озодликдан маҳрум этилди. Ҳаммаси шундан кейин бошланди.

Юпп Хайнкес Гвардиолага жуда юқори "планка" бериб кетганди.
Гвардиола Мюнхендаги 3 йиллик фаолияти давомида ҳар сафар "норматив"ни аъло даражада топширди. Шунингдек, ўшанда клуб раҳбарияти клуб имижини дунёга янада танитишда Пепдан фойдаланди. Шу боисдан ҳам аслида Гвардиола "Бавария"га таклиф этилганди.

Гвардиола "Бавария"га келганидан кейин ўз акаси билан агентлик бўйича бирга ишлади. "Бавария"да испаниялик футболчилар кўпайди, немислар эса аста-секинлик билан кетишни бошлади. "Бавария"ни имижини кўтарамиз, деб жамоа фалсафаси ўзгариб кетди.
Гвардиола "Бавария"да катта трансферларни амалга оширишни бошлади. Катта пуллар сарф этилди. Хёнессдан кейин клубда барча ишни ҳал қиладиган шахс эса Карл-Хайнц Румменигге бўлди.

"Бавария" афсонаси эса Гвардиолага тўлиқлигича ишонди ва унинг фалсафасини доим қўллаб-қувватлаб турди. Шу боисдан Пеп Мюнхенда шартномаси сўнггигача ушланиб қолди. Гвардиола билан эса доим испан жамоаларига қарши шармандали ўйинлардан кейин "Бавария" ЕЧЛдан чиқиб кетди.
Гвардиола услуб жиҳатдан ҳам, фалсафа бўйича ҳам "Бавария"га мос мураббий эмаслиги кўп таъкидланганига қарамасдан, Румменигге ўзи ҳурмат қилган Гвардиолани истеъфога чиқариш бўйича қарор қилмади.

Ули Хёнесс эса ўтган йилнинг февраль ойида муддатидан аввал озодликка чиқди. Унинг клубга расман президент сифатида қайтиши эса кузга келиб амалга ошди. Ули Хёнесснинг кетиши ва Гвардиоланинг келиши "Бавария"нинг фалсафаларини ўзгартириб юборганди. Ули қамоқдан чиққанидан кейин Пепни "Бавария"дан кетиши маълум қилинди. "Бавария" тезда икки нафар немис футболчиси, "Хоффенхайм"ни порлатган Руди ва Зюлени трансферини ҳал этди. Улининг президент сифатида қайтмасиданоқ "Бавария"даги ўринбосарлари эски фалсафани эслаб қолишди ва трансфер сиёсатини аввалгидек давом эттиришни қайта йўлга қўйишди.

Ули Хёнесс нега Анчелоттини истеъфога чиқаргани ҳақида айтиб ўтилди. Жамоадаги муҳит бузилгани, етакчи футболчилар билан муносабатлар ёмонлашгани асосий фактор сифатида қайд этилди. Кеча Ули Хёнесс немис матбуотига ҳам етакчилар билан муносабатдаги бузилишлар истеъфога сабаб бўлганини расман тасдиқлади.
Карло Анчелоттининг "Бавария"даги энг катта хатоси Рибери билан можарога боргани. Чунки Рибери гарчи жамоанинг сардори бўлмасада, ҳозирги "Бавария"даги биринчи рақамли шахс. Нойер сардор, Мюллер вице-сардор бўлгани билан бу икки футболчи "Бавария"га Риберидан кейин пайдо бўлган. Лам ва Швайнштайгердан кейин Рибери жамоадаги энг катта фигура ҳисобланади. Басти кетди, Лам фаолиятини тугатди ва Рибери жамоадаги ягона "оқсоқол"га айланди.

Рибери эса Ули Хёнесс билан энг яқин ва яхши муносабатдаги футболчи. Француз бекорга ҳар сафар деярли немисга айланганини ва "Бавария"ни ўз оиласидек кўришини таъкидламайди. Рибери ўз вақтида бир қатор Англия ва Испания гранд жамоаларининг таклифларини рад этганди. Ули Хёнессга бўлган ҳурмат ва "Бавария"га садоқати туфайли Рибери Мюнхен шаҳрининг "эркатой" футболчиси айланган. Ули Хёнесс қамалганидан ҳам "Бавария"да у ҳақида энг кўп эслаб турувчи футболчи Рибери эди. Интервьюларида "Бавария"га Ули етишмаётгани ва жамоа юраксиз қолганини кўп таъкидларди.

Ули Хёнесс энди жамоага мураббий танлашда анча эътиборли бўлиши аниқ. Унга кўра, Ули бир қатор жиҳатларга алоҳида эътибор қаратади. "Бавария"га энди немис мутахассиси келиши аниқ. Чунки Хёнесснинг асосий мақсади "Бавария"нинг аввалги мавқеини тиклаш ҳамда жамоани эски фалсафа асосида янгитдан қуриш.

Ули Хёнесснинг фалсафаси Германиянинг энг кучли футболчилари "Бавария"да ўйнаш керак. Энг яхши немис мураббийи ҳам "Бавария"да ишлаши лозим.
Яна ўша эски фалсафа "Бавария"га қайтмоқда. Айнан шу фалсафа туфайли "Бавария" халқаро майдонда ўз имижини ярата олган. Қайд этиш керакки, "Бавария" айнан ўша эски фалсафага муҳтож.

Ҳозирда кун тартибидаги энг муҳим масала - мураббий. Ули Хёнесснинг режаси бўйича, Анчелотти камида қишгача жамоада қолиши керак эди. Аммо бу қишгача чўзилмади. Эндиликда унинг ўрнини ким билан тўлдирилиши энг асосий саволлигича қолмоқда.
Юлиан Нагельсманн "Бавария"да ишлашдан бахтиёр бўлишини охирги пайтлар жуда кўп таъкидлаётганди. Ули Хёнесс ҳам ёш мураббийни жамоага олиб келишга қарши эмас. Аммо ҳозир буни деярли имкони йўқ. Чунки "Хоффенхайм" ўзининг ажойиб мавсумини ўтказаётган бир пайтда мавсум стартидаёқ муҳим фигурадан айрилишга кўнмаслиги аниқ. Ҳозир Юлианни "Хоффенхайм"дан олиб қўйиш ҳар томонлама нотўғри бўлади.

Юлиан Нагельсманн анча ёш ва "Бавария"да ишлашга ҳали улгуради. Шундан келиб чиқиб, Ули Хёнесс Нагельсманн вариантидан воз кечиши мумкин. Ҳозирда ким "Бавария" рулига келиши мумкин? "Майнц" ва "Боруссия" Дортмунддаги ажойиб иши туфайли танилган мутаҳассис Томас Тухель айни пайтда ишсиз. Дортмунд раҳбарияти билан ўртадаги можаро туфайли "Боруссия"дан кетган Тухель ҳозирда Мюнхенга келиш эҳтимоли юқори.

Немис матбуотига кўра, Томас Тухель билан шахсан Ули Хёнесс музокара ўтказишга киришган. Яқиндагина Томас Тухель Англиядан келган таклифга рад жавобини берганди. Тухель учун "Бавария"дан бўладиган таклиф анча қизиқарли бўлиши аниқ. Аммо Тухель "Бавария"да ишлашга қанчалик тайёр? Чунки ҳозир "Бавария"га келиб нафақат натижа кўрсатиш керак, балки жамоани қайта қуриш ва бу жараённи анча силлиқ ўтказиш лозим бўлади. Рибери ва Роббен каби жамоага меҳнати синган етакчилар билан ортиқча шов-шувларсиз ҳайрлаша оладиган, уларга керакли миқдорда ўйин амалиётини тақдим этишга тўғри келади.

Агарда тезда керакли номзод топилмайдиган бўлса, унда "Бавария"да вақтинча бош мураббий вазифасини бажариб турган Вилли Саньолга мавсум якунига қадар имконият берилади. Ушбу франциялик мутахассис "Бавария"да узоқ муддат ўйнаган ва жамоани жуда яхши билади. Саньоль бу борада жамоага тўлиқ мос келади.

"Бавария"нинг вақтинча бош мураббийи ва янги спорт директори Ҳасан Салихамиджич ҳамда Вилли Саньоль ўз вақтида жамоада бирга, бир қанотда ўйнашган. Улар ўзаро бир-бирларини жуда яхши тушунишади. Жамоанинг энг асосий фигураси, кийиниш хонаси етакчиларидан бири, ҳамюрти - Рибери билан Саньолнинг алоқалари анча яхши. Бу ҳам Саньолга ёрдам бериши мумкин.
Вилли Саньоль қисқа муддат Франциянинг "Бордо" жамоасида ҳам ишлаган ва кичик тажриба айни пайтда унга асқотиши мумкин.

"Бавария" одатда ҳар йили қишда ўзининг янги мураббийи номини эълон қилади. Агарда Вилли Саньоль қисқа фурсат ичида даҳшатли натижалар кўрсатса, жамоанинг ўйини ва ички муҳит аъло даражада бўлса, унда унга мавсум якунигача имконият берилиши мумкин. "Бавария" Вилли қўл остида кутилганидан ҳам зўр натижаларга эришса, балки "Реал"да бўлгани каби ҳамюрти Зидандек Саньолни ҳам мураббийликда ажойиб келажак кутаётган бўлиши мумкин. Бунинг учун Саньоль қисқа фурсат ичида ақлбоварқилмас натижалар кўрсатиши керак бўлади.

Ули Хёнесс ёзгача кутишни истаса ва Саньолдан фақат мавсум сўнггига қадар фойдаланмоқчи бўлса, унда "Бавария" олдида янги номзодлар пайдо бўлади. "Ливерпуль" устози Юрген Клопп, Германия терма жамоаси устози Йоахим Лёв ҳам ёзга келиб "Бавария" учун эркин бўлиши мумкин. Чунки яқиндагина Йоахим Лёв клубда ишлаб кўришга қарши эмаслигини билдирганди. ЖЧ-2018дан кейин Ули Лёвни Мюнхенга кўчириб келишга қодир. "Бавария" қайта қуришга муҳтож бўлиб турган пайт Йоахим Лёв мюнхенликлар учун идеал номзодга айланиши табиий. Чунки Лёв авлодлар алмашувини қандай ўтказиш бўйича алоҳида мутахассис саналади.
Юлиан Нагельсманн бўйича ҳам ёзда бемалол таклиф билан чиқиш мумкин бўлади.

Буёғига "Бавария"ни немис мутахасиси бошқаради. Фақатгина биргина истисно бўлиши мумкин бўлган вариант - Саньоль. Француз мавсум охиригача қолса ва фантастик натижа кўрсатса, унда Ули "Бавария"нинг собиқ футболчисига мураббийликда ҳам имконият тақдим этади. Акс ҳолда Тухель, Нагельсманн, Клопп ёки Лёв эртами-кечми "Бавария" рулига келиши деярли аниқ.

Гвардиола билан бошланган хато Анчелотти билан давом эттирилди. Ули Хёнесс эса келиши билан эски хатоларни қурбонига айланди. Буёғига ўша эски фалсафа асосида янги жамоа қурилади.

Ҳа-я, айтганча, "Бавария" фақат немис мутахассислари (Удо Латтек, Деттмар Крамер (икки маротаба), Оттмар Хитцфельд и Юпп Хайнкес) қўл остида Европа чемпионлар лигасида ғолиб чиққанини эслатиб қўйиш зарар қилмайди...

Хато (Пеп) кетидан хато (Карло) ёхуд Ули "Бавария"нинг эски фалсафасини қайтаради