Urganch shahrida Sport o'yinlari va engil atletikaga ixtisoslashtirilgan bolalar-o'smirlar sport maktabi (SO'EAIBO'SM) rahbariyati tashabbusi bilan 2005-2006 va 2007-2008 yillarda tug'ilgan yosh futbolchilar o'rtasida 1 oktyabr – O'qituvchi va murabbiylar kuni munosabati bilan ochiq birinchilik uyushtirildi.

Bir necha kun davom etgan musobaqada Xorazm viloyati va Qoraqalpog'iston respublikasi jamoalar ishtirok etdi. Katta yoshli bolalar musobaqasida 13 ta jamoa maydonga g'oliblik uchun bahs yuritdi. Ushbu birinchilikda “Xorazm” jamoasining sobiq futbolchisi, tajribali murabbiy Ilyos Xayrov ustozlik qilayotgan Urganch shahrining “Yoshlik” jamoasi futbolchilari g'oliblikni qo'lga kiritdi. Ikkinchi o'rin Gurlan tumanining “Gurlan”jamoasiga nasib etdi. Faxrli uchinchi o'rindan Nukusning “Nukus” va Urganch shahrining “Navro'z” jamoalari joy olishdi.

Shuningdek, 12 ta jamoa qatnashgan kichik yoshli “charm to'p” ustalari birinchiligida “Binokor”(Urganch shahri, murabbiyi Shohrux Yoqubov) jamoasi g'olib chiqdi. “Olimpiya”(Urganch shahri) jamoasi ikkinchi, “G'aybu”(Urganch tumani) va “Olimpiya”(Urganch shahri) jamoalari uchinchi o'rinni egallashdi.

- Sport maktabimizda umumxalq bayramlari va shonli sanalar munosabati bilan musobaqalar o'tkazishni ananaga aylantirganmiz, - deydi SO'EAIBO'SM direktori Jamoladdin Abdullaev.- Albatta, O'qituvchi va murabbiylar kuni ham bundan mustasno bo'lmadi. Bu bilan farzandlarimizga quvonchli onlarni tuhfa etdik. O'z navbatida yosh futbolchilarimiz chiroyli o'yinlari bilan barchada iliq taassurotlar qoldirishdi. Bundan juda xursandmiz.

Musobaqaning yopilish marosimi bayramona tarzda tashkil etildi. Tadbirda qatnashgan Xorazm viloyati jismoniy tarbiya va sport boshqarmasi boshlig'i Shokir Madaminov g'olib va sovrindor jamoalar futbolchilarini erishgan muvaffaqiyatlari bilan qutlab, ularni tegishli darajadagi diplom va medallar bilan taqdirladi.

Kezi kelganda aytib o'tish joizki, mazkur birinchilikni yuqori saviyada uyushtirilishida sport maktabining direktori Jamoladdin Abdullaev, direktor o'rinbosari Azamat Arjanov, yo'riqchi-uslubchi Anvar Alimov, katta murabbiy Alisher Ro'zmetov va boshqalar o'zlarining munosi ulushini qo'shishdi.

Ikrom XUDOYBERGANOV.

Xorazmlik yosh futbolchilar quvonchi