Jizzax viloyatining “Xuaxin-Jizzax” klubi o'z oldiga yuqori maqsadlarni qo'ygan. Klub transfer oynasi vaqtida tarkibni kuchaytirish uchun ko'plab yuqori ijrochilar bilan shartnoma imzoladi. Xo'sh, klub o'z oldiga qanday maqsadlarni qo'ymoqda? Bu haqda klub sport direktori Oybek Abdurahmonov bilan suhbatlashdik.

- Biz mavsumga tayyorgarlikni 5 avgust kunidan boshlab Jizzaxda boshladik, - deya gap boshladi Abdurahmonov. Asosiy tarkibning 9 nafar futzalchisi terma jamoa ixtiyorida bo'lgani tufayli mahalliy o'yinchilar bilan shug'ullanib turdik. Chempionat o'yinlariga yaxshi tayyorgarlik ko'rdik va bosqichma-bosqich o'yin uslubimizni shakllantirib bordik. Tarkibimizda sezilarli o'zgarishlar yuz bergan

- Selekciya ishlaridan qoniqish hosil qildingizmi?
- Albatta. Selekciya ishlaridan to'liq qoniqish hosil qildik. Tarkibga AGMKdan Davron Choriev, Ilhom Hamroev, Ixtiyor Ropiev, Anasxon Rahmatov, Husniddin Nishonov, “Paxtakor”dan Farhod Abdumavlonov, “Metallurg”dan Xunshur Erkinov, “Maksam-Chirchiq”dan Elbek To'lqinovlarni taklif qildik. Bu yigitlar bilan kelishuvga erishish jarayoni qiyin kechgani yo'q. Biz oldimizga yuqori maqsadlarni qo'yganmiz.

- Terma jamoa bosh murabbiyi Bahodir Ahmedov ham “Xuaxin-Jizzax”da ish boshladi. Ahmedovni taklif qilish jarayonida qiyinchiliklar kuzatilmadimi?
- To'g'risi, Ahmedov bilan kelishuvga erishish oson kechgani yo'q. Lekin viloyatimiz hokimi Ergash Alibekovich Salievning shaxsan o'zlari Bahodir Ahmedov bilan muzokara o'tkazdi. Shu inson tufayli kelishuvga erishdik. Taklifimizga rad qilmasdan rozi bo'lgan Bahodir akaga minnatdorchilik bildiramiz.

- Klubning asosiy maqsadi qanday?
- Faqat va faqat chempionlik uchun kurashamiz. Shu orqali Osiyo chempionlar ligasiga yo'llanma olib, kelgusi yilda ushbu turnirda ishtirok etishni maqsad qilganmiz. Bu yo'lda klubimiz rahbariyati – xususan viloyat hokimi, xuaxin cement zavodi barcha sharoitlarni yaratib bergan. Klub nomidan minnatdorchiligimizni bildiramiz.

“Xuaxin-Jizzax”ning maqsadi, tarkibga chaqirilgan futzalchilar xususida Oybek Abdurahmonov nima dedi?