16 sentyabr kuni Namangandagi o'yinda qo'pol xatoga yo'l qo'ygan Abdurashid Xudoyberganovning "Lokomotiv" - "Neftchi" bahsida ishlashi OAV noroziligiga sabab bo'ldi. Hamma o'zicha talqin qilayotgani uchun vaziyatga oydinlik kiritishga harakat qilamiz.

Xato qarash

Jamoatchilik "Navbahor" foydasiga xato qilgan referi chetlatilmagani uchun O'zFHMga etiroz bildiryapti. Aslida hakamlarni diskvalifikaciya qilish tartibi boshqacha:

Dastlab, markaz qoshidagi Ekspert-hakamlar komissiyasi epizodlarni tahlil qiladi. Agar qoidaga zid harakat aniqlansa, chora ko'rishi uchun O'FA Hakamlar qo'mitasiga taqdimnona kiritiladi.

Ayni paytda O'zFHMning komissiya va qo'mitaga bosim o'tkazishga haqqi yo'q. Shunday ekan, OAVning to'g'ri etirozlari noto'g'ri manzilga yuborilyapti.

Tayinlov sababi

Bu bo'yicha O'zFHM matbuot xizmatiga murojaat qildik. Tashkilot masullari "qo'mita hali yig'ilmagani uchun referi hozircha (!) chetlatilmaganini" malum qilishdi.

Shuningdek, Superliga bahslarida ishlovchi 3 nafar referi (Risqullaev, Najafaliev, Lutfulin) OFKdan chaqiruv olgani tufayli 20-turda hakamlar tanqisligi ro'y bermoqda. Shunday bo'lsa ham, vaziyat to'g'ri baholanib, Xudoyberganov yashil maydonda emas, VAR xonasida ishlaydigan bo'ldi.

Nega jazolanmadi?

Namangandagi uchrashuvdan keyin "Qizilqum" masullari hakamning qarori bo'yicha rasmiy shikoyat yozgani bildirilgan edi. Bunday holatda qo'mita etiroz uchun tegishli to'lov (10 mln so'm) to'langanidan keyin 3 ish kunida yig'ilishi kerak.

Bu borada malumot olish uchun O'zPFL bilan bog'landik. Ish "Qizilqum" jamoasi reglamentda belgilangan to'lovni 48 soat ichida to'lamagani uchun ko'rib chiqilmagani aytildi (Demak, Navoiy klubiga nisbatan reglamentning 14-bob 10-bandiga muvofiq chora ko'ril(a)di).

Qachon chetlatiladi?

Buning uchun O'FA hakamlar qo'mitasi qachon yig'ilishini bilish kifoya. Mazkur mutaxassislar so'nggi bor 15 sentyabrda jamlangan va oxirgi 20 kunda ro'y bergan xatolar bo'yicha qaror chiqarishgan edi. Demak, 20-turdan keyin navbatdagi majlis uchun etarli material yig'ilib qolsa kerak. Ungacha vahimaga hojat yo'q.

Muallifning telegramdagi kanali → FR| futbol ANALIZI

Xudoyberganov chetlatilmadimi?