"Napoli" - "Udineze"

"Napoli"da hammasi ancha tinch. Petanya va Meret jarohatlarini davolash bilan band hamda o'yinni aniq o'tkazib yuborishadi. Shuningdek, Malkyu va Tuanzebening ham maydonga tushish imkoniyati past. Osimxen sport formasini tiklab bormoqda va aynan u hujumning asosiy kuchi bo'lishi kutilmoqda. "Udineze"ga kelsak, u erda vaziyat kutilganidek. Uolles diskvalifikaciyadan so'ng safga qaytdi. "Kichik zebralar"da jarohat olgan futbolchilar deyarli yo'q. Shu sababli, jamoa "Roma"ga qarshi o'yindagidan ancha farq qiladi.

Oxirgi o'zaro bahsda "Napoli" 4:0 hisobida "Udineze"ni mag'lub etgan. Bu gal ham bukmekerlar "partenopeylar"ni favorit hisoblashmoqda. Ammo "Udineze" so'nggi paytlar ancha yaxshilanganini ham unutmaslik lozim.

"Inter" - "Fiorentina"

Avvalgi tur sarhisobiga ko'ra, "Inter" o'z o'yini va natijasidan qoniqmagan bo'lsa kerak. Indzagi bu gal De Vrey va Brozovichga ishonch bildira olmaydi. Shunday ekan, ularning o'rnida D`Ambrozio va Vidalni ko'rishimiz mumkin. Doimiy ravishda zaxiradan maydonga tushadigan Robin Gosens asosiy tarkibdan o'rin olishi kutilmoqda. Vichenco Italyano jamoasi haqida gapiradigan bo'lsak, tarkib bilan bog'liq hech qanday muammo yo'q. Qishki transferlardan so'ng, murabbiyda tarkib imkoniyatlari kengaydi, biroq katta o'zgarishlar bo'lmasa kerak.

So'nggi o'zaro uchrashuvda "Inter" Florenciyadan 3:1 hisobidagi g'alaba bilan qaytgan. Hozir ham ular ustun bo'lishiga qaramay, "Fiorentina"ning kutilmagan "sovg'alari" bo'lishi mumkinligini yodda saqlash kerak.

"Kalyari" - "Milan"

"Kalyari"ga katta yordami tegishi mumkin bo'lgan Nandes maydonga tushishi so'roq ostida turibdi. Lekin Rog va Strotman o'ynamasligi aniq. Shu sababli, jamoaning maydon markazidagi o'yinchilarga oson bo'lmaydi. Barcha umid hujumdagi Pavoletti-Joao Pedro juftligidan. Teo Ernandesning qaytishi "Milan" chap qanoti xavfli bo'lishidan darak bermoqda. O'tgan turda unchalik yaxshi o'yin namoyish etolmagan Sandro Tonalliga dam berilishi mumkin. Shuningdek, Salemarkis-Mesyas rokirovka bo'lish ehtimoli bor.

Birinchi davra uchrashuvlarida "Milan" raqbini mag'lub etgan (4:1). Jamoa hozir ham Sardiniyaga yaqqol favorit sifatida yo'l olmoqda. Shunday bo'lishi aniq edi, axir bejizga turnir jadvalining 1-o'rnini band etib turgani yo'q-ku?!

"Yuventus" - "Salernitana"

Jamoa qaqshatqich zarbaga uchrab, Chempionlar Ligasini tark etdi va jahl otiga mingan. Albatta, tarkibda ham o'zgarishlar bo'lishi aniq. Bernardeskiga o'yin amaliyoti berilsa ajab emas. Jarohatlar sabab maydon markazida muammolar yuzaga kelgan. Artur safga qaytib ulgurmasa, eksperimentsiz ish bitmaydi. Davide Nikola shogirdlarida esa aksincha, kayfiyat ajoyib. Klub o'tgan tur "Sassuolo" bilan o'yinda mag'lubiyatdan qutilib qoldi.

Salernoda birinchi davra to'qnashuvida "Yuventus" 2:0 hisobida ishonchli g'alabani tantana qildi. Hech kimga sir emas, turinliklar bo'lajak bahsda ham favorit. "Keksa sinora" ispanlarning alamini ham "Salernitana"dan olishga urinadi. Jamoa qatorasiga yana bir sensaciyani ro'yobga chiqarishi o'ta mushkul vazifa.

"Roma" - "Lacio"

Konferenciyalar Ligasida keyingi bosqichga chiqqan "bo'rilar"ning kayfiyati biroz ko'tarildi. Joze Mourinoda ham tarkib bilan muammolar yo'q. Barcha etakchilar safda va jangga tayyor. Murabbiydan kutilmagan sovg'alarni kutmasak ham bo'laveradi, sababi hozir har bir o'yin finalga teng. Diskvalifikaciya sabab Cakanya o'yinni o'tkazib yuboradi, shu sabab Anderson va Pedroning o'rnini bosadigan variantning o'zi yo'qdek. Sarrining xursandchiligiga sabab bo'lib, Marushich safga qaytdi. Kataldi esa sonidagi muammo tufayli bellashuvni o'tkazib yuboradi.

Avvalgi safar jamoalar ancha quvnoq bahs namoyish etib berishgan va "Lacio" 3:2 hisobida zafar quchgan. Bu safar esa kichik bo'lsa-da, ustunlik "Roma" tomonida. Mour shogirdlari hamshaharlarini musobaqa jadvalida quvib o'tishlari mumkin. Nima bo'lganda ham bizni "olovli bahs" kutib turibdi.

Sergey Rumyancev
Nozima Zaripova tarjimasi

Yakun yaqin: A Seriya 30-tur prevyusi