Butun bir hayotini futbolga bag'ishlagan bu fidoyi inson qutlug' 70 yoshni qarshi oldi. Umrining yarim asrini esa futbol bilan hamnafas yashab kelmoqda.

V.G.Aleshnikov futbolchilik faoliyatini 1969 yili “Chkalovec” (Novosibrsk) da boshladi. 1972-1973 yillarda “Mehnat zaxiralari” (Dushanbe) va 1974-1978 yillarda “Paxtakor-Irrigator” (Jarqo'rg'on) jamoalarida to'p surdi. O'z mehnat faoliyatini murabbiy bo'lib Surxondaryo viloyati Jarqo'rg'on tumanidagi BO'SMda boshlagan. 1977 yilda Respublika “Paxtakor” jamiyati Markaziy Kengashi tomonidan “Eng yaxshi murabbiy” deb topilgan. 1976-1994 yillarda hakamlik sohasida faoliyat yuritgan. 1986 yili Respublika toifasidagi hakam unvoniga sazovor bo'ldi. Gali Imamov, Sardor Najafaliev, Radik Serazitdinov, Konstantin Voronin, Aleksey Pivovarov, Viktor Enns, Bobur Haydarov, Noil Lutfulin, Evgeniy Volnin, Alisher Abdullaev, Rashid Aytekov kabi shu soha vakillari bilan O'zbekiston Chempionati, Kubogi bahslari hamda sobiq Ittifoq Chempionati 2 liga uchrashuvlarini boshqargan.

Professional murabbiy sifatidagi ish faoliyatini 1995 yili Surxondaryoning “Sho'rchi” jamoasida bosh murabbiylikdan boshlagan. Oradan o'tgan yillar davomida u “Surxon” (Termiz) klubini ham boshqardi.

2000 yillardan etiboran esa o'z taqdirini bevosita “Sho'rtan” jamoasi bilan bog'ladi. G'uzorda ko'p yillar bosh murabbiylikdan toki, murabbiy, futbol maktabi direktorligi, klubda avval texnik direktor, keyin esa sport ishlari bo'yicha direktor lavozimlarida fidokorona mehnat qilib keldi. O'tgan yillar davomida Viktor Aleshnikov jonkuyar ustoz sifatida juda ko'plab shogirdlarni tarbiyalab kamolga etkazdi. Bugungi kunda uning shogirdlari jamiyatimizning turli sohalarida faol mehnat qilib, Vatanimiz ravnaqi uchun o'z bilim va ko'nikmalarini qo'shib kelishmoqda. Ulardan bazilari, misol uchun Otabek Shomurodov va Bahodir Annamatovlar futbolda ish olib borishmoqda. Erkin Mirzaev, Botir Rasulovlar esa “Sho'rtan” klubining o'zida samarali mehnat qilishmoqda. Eldor Shomurodov, Sardor Abduraimov kabi futbolchilar esa nomdor klublarda to'p surishmoqda.
Tajribali mutaxassis Viktor Aleshnikov 2018 yilning 23 fevralidan etiboran “Sho'rtan” PFK MCHJga Bosh direktor etib tayinlandi. Masuliyatli lavozimda klub xodimlari va barcha muxlislar nomidan bugungi yubilyarimizga muvaffaqiyatlar, mustahkam sog'lik, uzoq umr tilab qolamiz. V.Aleshnikov rahbarligida “Sho'rtan” mamlakatimiz futbolidagi o'z mavqei, o'rni va obro'sini yana tiklab olishiga ishonamiz.

Yana bir bor 70 yoshingiz qutlug' bo'lsin deb qolamiz!!!

Yarim asr futbol bilan hamnafas