Яқинда сайтимизга ташриф буюрган Тимур Кападзе, сайтдаги фикрлар футболчиларни руҳиятига таъсир ўтказишини айтиб ўтган эди.

Мен ҳам жуда кўп кўраман, футбол жамоатчилигини жуда кўп қисми сайтнинг фикрлар бўлимини ўқийди, мақола уларга қизиқ эмас, фикрларга кўпроқ муносабат билдирадилар. Ҳуддики фикрларни биз ёзгандек, бизга душман кўзи билан қарайдиган мураббий ва футболчилар ҳам етарлича топилади. Ўша фикр қолдирувчиларга жаҳл қилиб гол ургач қўлини бигиз қиладиган "маэстро"ларимиз бор. Керак бўлса ЎФФ раҳбарига, мағлубиятга сайтдаги фикрлар айбдор деб чиққан кишилар бор.

Шундай "тип"даги футбол ичидагиларга таклифим, кирманг, ўқиманг ўша фикрларни, агарда у Сизнинг ўйинингиза таъсир қилаётган бўлса, ўйинингиз ёки тактикангиз биргина фикр билан ўзгариб кетаётган бўлса, яхшиси бошқа иш қилинг!

Хайрулла Холиқов мендан аввал ўз мақоласида ёпиқ эшикларни фойда ва зарарларини ёзиб ўтди. Мен шу нарсага ишонаман-ки, Липпи савиясидаги мураббий Ўзбекистон - Хитой учрашувининг 10-дақиқасидаёқ, 2 йилдан бери бир қолипга тушиб қолган терма жамоамиз ўйинини "ўқиб", 11-дақиқадан янги тактикага ўтиб кета олади. Қолаверса, унинг қўл остидаги Ли Ву деган шундай ҳужумчиси бор-ки, у Ўзбекистон миллий терма жамоасининг икки нафар асосий ҳимоячиси, Анзур Исмоилов ва Егор Кримецни аллақачон таниб олган. Бугун "Шанхай ИСТ"да Халкдан ҳам муҳим бўлиб турган бу ҳужумчига қандай қаршилик қилиш борасида кўпроқ бош қотирганимиз ва МТЖга қарши бўлиб қолган мухлис-у, мутахассисларни яхши гап билан ўз томонимизга оғдириб, уларнинг дуоларини олишимиз ўрнига, кундан-кунга МТЖни мухлисдан узоқлаштираяпмиз!

Футбол ким учун? Мағлуб бўладиган ўйинлар очиқ, ҳеч бўлмаса ўртамиёналарга қарши ғалаба қозонишимиз мумкин бўлган ўйинлар ёпиқ бўладими? Айнан шу ўйинлар орқали Хитой ва Жанубий Корея олдидан мухлислар ишончини қозониб, ҳар бир футболчи ўйиндан кейин трибунадаги мухлисларга бориб, "Бизга ишонинг, бизни дуо қилинг, фақат Сизнинг ишончингиз ва дуоингиз ила ЖЧга чиқамиз", деб таъсирли сўзларни айтсин. Самвел Бабаян матбуот анжуманида иштирок этиб, ўзининг ораторлигини намойиш қилиб, халлқа ишонч берсин. ОАВларда тинмай қўллаб-қувватлаш бўлсин, машғулотни у ерда деб, бир соат аввал бошқа ерга кўчирмай. Бу ерда мен матбуот хизматини айбламайман, унга айтишди, у бажарди. Ёпиқ машғулотлар билан ЖЧга чиқа олганимизда, Эрон ва Сурияга мағлубиятга учрамасдик. Ёпиқ машғулот иш берганида, КХДР доимий ЖЧда иштирок этарди. Ундан кўра ТВга чиқиб барчага умид беришсин, терма жамоа ўз кучига ишонаяптими, унда бемалол қўрқмасдан халқ ичига кирсин! Агар чиқиш имкониятини суст баҳолатёган бўлса, буни ҳам очиқ айтишга қўрқмаслик керак, муаммони биргаликда ҳал қилайлик-ки, кейинги авлод ЖЧга чиқсин.

"Кичкина табиб"да айтганидек, бизнинг фаришталаримиз учиб кетган. Негадир муҳим паллада кимдир ўз клубида захирага михланади, яна кимдир жароҳат олади, аксига олиб рақибларимиз сўнгги паллада ғалаба қозониб, формага кириб олади. Бу фаришталарни қайтариш учун халқнинг ишончини қозониш керак.

Аслида ЎФФ баёнитидагидек ўйинлар ёпиқ ўтсин деган хат мавжуд эмас. Хат бор, аммо у ерда ўйин "А" категорияда рўйхатдан ўтмаслиги, чунки икки терма жамоа 6 нафардан кўпроқ футболчиларни алмаштиришни сўраганликлари. Бу ҳолда ўйинлар назорат учрашуви мақомида, ФИФАдан рўйхатдан ўтмайди. Фақат ФИФА бир нарсани яъний, 1593-рақамли циркулярда, икки федерация ОАВ ва мухлисларни кейинчалик ўйин натижаси ФИФА рейтингида нима учун акс этмаганлиги каби саволлар уйғонмаслиги учун, уларга тушунтириш ишларини олиб боришларини талаб қилади. Шу холос. Ўйинга бемалол чипта ҳам чиқарса бўлади, уни бепул тарзда ўтказса ҳам. ОАВда ҳам ёритишга ҳеч қандай тўсиқ йўқ.

Ҳудди шу ишни Қирғизистон томонидан Тошкентга ташриф буюрган ОАВ амалга ошираяпти. Агар ўз майдонимизда бўлиб ўтадиган учрашув суратлари ёки маълумотларини қўшни Республика сайтидан оладиган бўлсак, росмана уят бўлади. Агар фақат федерация вакилларига рухсат берилса, у ҳам бари-бир сайтларга берилса, бу ҳам адолатсизлик, чунки ОАВда чиқиши мумкин эканки, ЎФФни ўзи ҳам берган бўлади. Денисов шуларни билса эди...

Қолаверса, Александр Крестинин ўйинга оид фиклари билан аллақачон ўртоқлашишни бошлаб юборди. Демак, улар учун ўйинни очиқ ёки ёпиқ бўлиши умуман қизиқ эмас. Крестинин ҳам Осиё чемпионатига чиқиш учун яхши имкониятга эга, аммо унга ўйи ёпиқ ўтадими, очиқми фарқи йўқ.

Кўпинча сайтимизнинг ўйиндан аввалги тахминий таркиби 90-95% тўғри чиқади. Энди ўзингиз ўйланг, ОАВ билган нарсани Липпи ёки Кейруш каби Европада ўз ўрнига эга мураббийлар билмайдими? Қачонки футбол мухлис учун тўлиқ очиқ бўлади ва унга тўғри тушунтирилади, шунда мухлис ҳар қандай вазиятда футболни қўллаб-қувватлайди.

Худо йўлимизни очиб ЖЧга тўғридан-тўғри чиқиб кетсак, кетдик. Лекин учинчи ўринга илиниб қолсак-чи? Биронта мухлис қўллаб-қувватлашига ишонасизми? Ундан кўра ҳозирдан мухлисга "пахта" қўйишни ўйлаб кўрсангиз бўларди? Улар ҳали "плей офф"да ас қотиши керак. Агар тўғридан-тўғри чиқсак ҳам бу мухлиснинг дуоси, шунинг учун йўлланмани қўлга киритиб қолсак, Хожибойни латифасидан бўлмасин. "Ҳосил яхши бўлса, деҳқон зўр ишлади, ҳосил ёмон бўлса, об-ҳаво таъсир қилди", деганидек. Деҳқонни кўрдик, куздаги теримдаги "план"ни кўришимиз қолди.

Нодирхўжа Юлдашев

Ёпиқ эшиклар билан Липпини чалғита оламизми ва "комент" ҳақида...