Evropada transfer oynasi hali yopilgani yo'q. Bu o'lkada so'nggi lahzalargacha oldi-sotdilar davom etishi tabiiy hol. Ochig'i, qaysidir yulduz futbolchining boshqa jamoaga o'tishi eng qiziqarli va vaqt o'tgan sari chinakamiga zerikarli mavzuga aylanadi. Kimdir qaysidir jamoaga o'tishga rozi, kimdir narxlardan norozi va yana kimlardir boshqa narsalarni orzu qilyapti. Xullas, transfer masalasi shunaqa.

Demak oxirgi paytlarda ko'p muhokama bo'layotgan mavzularga to'xtaladi. Neymar “MYU”ga o'tyapti, “Arsenal” Edinson Kavani va Karim Benzemani xarid qilish ilinjida, boshqa ingliz klublari esa Garet Beyl uchun yana harakat qilib ko'rishmoqda. Biroq matbuot bu mavzularni harchand yoritmasin, ushbu xaridlarni amalga oshishi juda qiyin ekanligini muxlis xalqi juda yaxshi biladi. Tushinish qiyin, nega endi bu yulduzlar o'z jamoalarini tark etishlari kerak ? Avvaliga masalaga mana shunday savol bilan murojaat qilinsa, to'g'riroq bo'lardi. Neymar “Barselona” etakchisi. Braziliyalik futbolchining Katalon klubidagi ishlari juda yaxshi ketmoqda, gollar uryapti, Enrike Neymar uchun asosiy tarkibda maxsus joyni naqd qilib qo'ygan bo'lsa, futbolchining transferi borasida yana nima ham deyish mumkin ? “Real” Beylni sotmasligini xar yili etirof etadi. Biroq “chiqmagan jondan umid” deya xar transfer mavsumida “Chelsi” yoki “MYU” uelslik ijrochiga taklif yuboradi. Oddiy qilib aytganda, qachonki futbolchining o'zi amaldagi jamoasi yoki murabbiyi bilan biron-bir muammoga duch kelmasa, bunday yuqori saviyadagi futbolchilar o'z jamoasini o'zgartirishi juda qiyin masala. Keling, shu o'rinda yaqin orada boshqa jamoaga o'tib ketgan yulduzlarga qisqacha nazar tashlaymiz. Pedro Rodriges nima uchun “Barselona”dek jamoani tark etdi? Sababi oddiy: Hujumchi zaxirada qolib ketayotgandi. Radamel Falkao “MYU” ni “Chelsi” ga almashtirdi. Buning sababi ham oddiy. Kolumbiyalik ijrochi Van Gal qo'l ostida o'zini ko'rsata olmadi. Oddiy qilib aytganda, uning “MYU”dagi ishlari o'xshamadi.

“Real” ning afsonasi Iker Kasilyas endi o'z omadini “Portu”dan qidiradi. Afsonaviy posbonning “Real” dan ketish sabablarini ham uzoq qidirib o'tirish shart emas. Iker so'ngi paytlarda ishonchni oqlamay qo'ygandi. Yulduz futbolchilarning transferi uchun mana shunday jihatlar sabab bo'ladi. Shuning uchun Messi va Ronalduni “PSJ”da birga faoliyat olib borishi haqidagi xabarlarga ko'p ham etibor qilmang. Lekin baribir ishqibozlar futbol va unga aloqador shahslar haqida gaplashishni yoqtirishadi. Na iloj!

(Malumot o'rnida mazkur dastur “Ruxsor” radiosi orqali 13:30, 17:30 va 20:30da efir uzatiladi)

Xojiakbar Jabborov

Yulduzlarning transferi qachon amalga oshadi?