"Ювентус" "Наполи"га қарши — бу Италиянинг шимоли ва жануби ўртасидаги азалий кураш тимсоли. Бу "Интер" ва "Милан"да ёки "Рома" ва "Лацио"да бўлгани каби қўшнилар кураши эмас. Бу узоқ километрларга қарамай сақланиб келаётган адоват. Бу турли темпераментлар, маданият ва идеологиялар тўқнашуви. Турин ва Неаполь — бу битта мамлакат. Шунга қарамай, бир-биридан ер билан осмонча фарқ қилади. Бу ҳаётнинг ҳар бир жабҳасида сезилади. Жумладан, футболда ҳам.

Бундай вазиятда "Наполи"да ишлаган, ишлаганда ҳам клуб тарихидан ўрин эгаллаган мураббийнинг "Ювентус"га келиши – алоҳида мавзу. Ахир "Наполи" Диего Марадона даврларидан буён илк бор яна скудеттони қўлга киритди. Шу сабаб Лучано Спаллетти тату-устасига мурожаат қилиб, қўлига тарихий ғалабани муҳрлади.

"Юве" мухлислари жамоага танаси ашаддий рақибнинг логотипи билан "ифлосланган" мураббий келганидан унчалик ҳам мамнун эмас. Эътиборлиси, мутахассис "Наполи"дан ташқари, туринликлар учун яна бир тарихий рақиблардан бири "Интер"да ҳам ишлашга улугрган. "Рома" билан ҳам Спаллетти "Ювентус"нинг анча "қонини ичишга" муваффақ бўлган.

Қисқароқ қилиб айтганда Спаллетти биографияси "Юве" бош мураббийлиги учун муносиб номзод ҳам эмасдек. Бошқа томондан Лучанонинг аввалги иш жойлари ва қўлидаги татуировкаси — туринлик мухлисларни қайғуга солиши керак бўлган охирги масала бўлиши керакдек. Ҳозир клубнинг аҳволи яхши эмас. Ҳозирнинг ўзида ва умумий охирги йилларда.

"Ювентус"нинг муаммоларини биргина мураббийнинг ўзгариши билан ҳал қилиб бўлмайдигандек. Раҳбарият даражасида бошланган муаммолар клубнинг ишида ҳам етарлича учрамоқда. Буни кўриш учун охирги икки мавсумга эътибор қаратса ҳам етарли. "Юве" "Наполи"дан ўша машҳур спорт директори Кристиано Жунтолини ўз томонига оғдириб олишни уддалади. Айнан у Спалетти билан чемпионликнинг бош "айбдорларидан" эди. Жунтолига катта имкониятлар тақдим этилди, жумладан, бош мураббий танловигача.

Макс Аллегрини Италия Кубогидаги ғалаба ва қўлга киритилган Чемпионлар Лигаси йўлланмасига қарамай, эски давр вакили ҳамда "модадан қолган" мураббий деб ҳисоблашди. Клубга Тьяго Мотта таклиф этилди. Унинг ўзига хос услубдаги "Болонья"си А Серия кашфиёти бўлган ва ЕЧЛ йўлланмасини қўлга киритганди ўша кезлари. Дастлабки тахминларга кўра, ёш, катта натижаларга чанқоқ, умидли мураббий "Юве"ни янги даражага олиб чиқиши керак эди. Яъни жамоа унинг қўл остида шунчаки ғалабаларни қўлга киритиши эмас — балки буни чиройли тарзда, мухлисларга ёқадиган қилиб амалга ошириши кутилганди.

Амалда эса узоқ муддатга, катта умидлар билан олиб келинган Мотта биринчи мавсум давомидаёқ ҳайдалди. Жунтоли ўз ўрнидан қўрқиб, Тьягони ортиқча ҳимоя қилмай қўя қолди. Натижада бош мураббий ҳайдалди, спорт директори эса ишда қолди. Бироқ... Фақатгина ёзгача. 2024/2025-йилги мавсум якунлангач, Жунтолига ҳам чиқиш эшиги кўрсатилди.

Моттанинг ўрнига Игор Тудор олиб келинди. Дастлаб бу келишув — мавсум охиригача мўлжалланганди. Хорват ўз миссиясини ажойиб бажара олди: қисқа фурсатда "Ювентус"ни уйғота олди ва жамоа барча муаммоларга қарамай, Чемпионлар Лигасига чиқишни уддалади. Ёзда "кекса синьора"ни буёғига ким олға бошлайди, деган савол қизғин муҳокамаларга сабаб бўлди. Версияларнинг бирига кўра, клубдагилар Антонио Контени қайтаришни орзу қиларди.

Бироқ Конте ва Аурелио Де Лаурентис ўртасидаги таранг муносабатлар, чемпионликдан кейиноқ кетиб қоладиган даражада ёмон эмасди. Спаллетти 2023-йилги мавсумдан кейин айнан шундай қилганди, Конте — йўқ. Антонио Неаполда қолди, "Ювентус" эса қуруқ қўл билан қолиб кетди. Туринликлар Контени кутиш билан бандлигида "Рома" ўша пайт бўш бўлган Жан Пьеро Гасперинини Римга олиб кетиб қолди. Оқибатда клубдагилардан Игор Тудор билан янги шартнома имзолашдан бошқа яхшироқ фикр чиқмади — битим 2027 йилгача амал қилиши билан ўшанда ҳеч кимнинг иши бўлмади деярли!

Спорт блогини амалда Дамьен Комоллига топширишди. "Тулуза"дан келган мутхасссис Душан Влаховични катта маоши туфайли ҳеч қаерга ўтказа олмади. Бошқа томондан текинга Жонатан Дэвидни қўлга киритди, Луа Опенда ва Эдон Жегровани жамоага олиб келди. Қоғозда барчаси ёмон эмасдек.

Бироқ мавсум бошланди ва "Ювентус" у қадар ишончли кўринмасди. Натижада Тудор ва Комолли ўртасидаги келишмовчилик ҳақида миш-мишлар тарқала бошлади. Эмишки францияликнинг фикрига кўра, мураббий янги футболчилардан нотўғри фойдаланаётган. Ҳужум чизиғи вакиллари бўлган учовлон Дэвид, Опенда ва Жегрова биргаликда 2 та самарали ҳаракатни амалга оширган. Ҳар иккиси Дэвиднинг ҳисобида (гол ва ассист). Охиргиси 13 сентябрда қайд этилган.

Охир-оқибат 7 ўйинлик ғалабасиз ва 4 ўйинлик голсиз сериядан сўнг Тудорни ҳайдаб юборишди. Тьяго Мотта "кекса синьора"дан "кетгач" ҳамон ишсиз. Туринликлар мураббий ва унинг штабига маош тўлашда давом этишмоқда. Тудор иш топгунича "Юве" унга ҳам маош тўлашга мажбур. Қўшимчасига Лучано Спаллетти ҳам Туринга текинга келгани йўқ. Клуб менеджменти ишига "ҳавас қилса" арзийди!

Спаллетти шартномасининг битта яхши томони — у 2025/2026-йилги мавсум охиригача мўлжалланган. Агарда клуб ЕЧЛ йўлланмасини қўлга кирита олса, битимни янгилаш мумкин. Клуб кейинги ҳаракатлар учун ўзига қулайлик яратмоқда, бу яхши. Бироқ Тудорнинг шартномаси ҳам аввалига шундай эди ва клуб 2025 йил ёзида хорватиялик бўйича қабул қилган қарори, кеийн аён бўлдики, хато бўлган.

Шунингдек, ёддан чиқармаслик зарурки Спаллетти ва Тудор — турли даражадаги мураббийлар. Мутахассисларда бир гап бор: ҳайдаш — ишнинг ярми, бўш қолган жойга кимни таклиф қилиш жуда муҳим. Бу борада Тудорни Спаллеттига алиштирилиши "Ювентус" учун кучайишдек. Ҳа, Лучанонинг Италия терма жамоасида омади чопмади. Лекин биринчидан, бу фақатгина унинг айби эмас. Иккинчидан, унинг мураббий сифатидаги бэкграунди барибир Тудорникидан анча қизиқарлироқ.

ОАВ маълумотларига кўра, "Ювентус"да Спаллеттидан ташқари бошқа вариантлар ҳам бўлган. Жумладан, Раффаэле Палладино ва Роберто Манчини нмозодлари кўриб чиқилган. Палладино — бу Мотта типажидаги мураббий: у ҳам ёш, умидли ва нисбатан кичикроқ клубларда муваффақиятга эришган — "Монца" ва "Фиорентина" каби. Раффаэле, раҳбариятдан билан келишмовчилик бўлмаганида балки ҳали ҳам Флоренцияда ишлаётган бўларди. Ёзда ёш мураббий бир куннинг ўзида клубдан кетганида, бутун Италия шокка тушганди.

Палладино иқтидорли қўшимчасига у "ювентини" ҳисобланади — футболчилик фаолиятини Туринда бошлаган. Бироқ бу нарса натижа бўйича ҳеч қандай кафолат бермайди. "Ювентус" даражасидаги клубларда ишламаган. Қўшимчасига, яқиндагина туринликлар Тьяго Мотта тажрибасини бошдан ўтказди — у ҳам ёш, умидли ва замонавий дейилганди. Яна шу кўчага қадам ташлашга "Ювентус" қарор қилмади.

Роберто Манчини — буткул бошқа масала. У Италияда ҳам, унинг ташқарисида ҳам тажрибаси билан мақтана олади. Бироқ Манчини жуда қиммат мутахассис! Уни таклиф қилиш — жиддий таваккал. У билан хайрлашиш эса — барчасидан ҳам қийинроқ иш бўлиши мумкин. Товон пулларини ундириш бўйича Жозе Моуриньюни қирол дейишга одатланиб улгурганмиз. Турли сабабларга кўра, ҳайдалишлардан кейин португалиялик умумий ҳисобда 100 млн евродан кўпроқ пул ундирган. Бу борада Манчини айнан Моурнинг энг яқин тақибчиси.

"Ювентус" ҳамон Моттага маош тўлайди. Энди Тудорга ҳам маош бериб туришга мажбур. Бу икковлон иш топгунига қадар ва улар иш топармикин, буни ўзи алоҳида масала. Агар уларнинг ўзи истаб, бирор жойда иш бошламаса клуб 2027 йилгача маош тўлаб боришга мажбур. "Calcio E Finanza"нинг маълумотларига кўра, умумий сумма 27 млн еврони ташкил қилиши мумкин.

Бундай вазиятда товон пулларини ундириш бўйича вице-қироли Манчинини таклиф қилиш — молиявий жиҳатдан ақлбовар қилмас таваккалчилик бўларди. Маълум сценарийда "Ювентус" — бир йўла 3 нафар ҳайдалган мураббийларига маош тўлаётган биринчи клубга айланарди!

Барча омилларни ҳисобга олиб айтганда, Спаллетти — энг яхши номзод. У Палладинодан тажрибалироқ, Манчини сингари ўта қиммат эмас. Мавсум охиригача шартнома имзолашга рози бўлди. Бундан ташқари Манчинидан фарқли ўлароқ, Спаллетти кўпроқ эътиборини бошқа нарсалар эмас, айнан мураббийликка қаратади. Шартнома шартларини у ҳам яхшилаб ўрганиб чиқади, тўғри, аммо Манчини учун айниқса охирги йилларда ишлар режадагидек кетмаса, "қутқарувчи парашют" муҳимроқ бўлиб қолгандек. Спаллеттининг бундай одати йўқ.

Тунда "Ювентус" янги бош мураббийи қўл остидаги илк ғалабасини тантана қилди. Сафарда "Кремонезе" (1:2) мағлубиятга учратилди. Жамоа 5-поғонага кўтарилиб олди ва етакчи "Наполи" билан фарқ 4 очкони ташкил қилмоқда.

Спаллетти барча муаммоларни ҳал қилиб ташлай олмаслиги турган гап. Мураббий жамоага ва унинг ўйини, натижаларига жавоб беради. Туринда эса бутун клуб, бошдан-оёқ, мазаси йўқ. Шундай бўлсада, ҳеч бўлмаса "Юве"нинг ҳолати яхшиланиши учун бор вариантлар ичидан энг маъқули танланган. Қолганини эса вақт кўрсатади.

"Ювентус"да яна "янги мураббий" операцияси — Спалетти бор вариантлар ичида энг зўри!