- Birinchi marotaba o'tkazilayotgan "CAFA Nations Cup-2023" musobaqasi haqida fikringizni aytsangiz. Raqiblar va bo'lib o'tgan o'yinlar hamda oldindagi raqib haqida...

- Albatta, ushbu musobaqaga keladigan bo'lsak, juda qiziqarli davom etmoqda. O'zi har doim qo'shnilarimiz bilan o'yinlarda maydonga tushishning o'zi maroqli bo'lib kelgan. Musobaqa boshlanib bo'ldi. Birinchi o'yinda ham, ikkinchi o'yinda ham durang qayd etdik. Turkmaniston termasi bilan uchrashuv davomida ustunlik qildik, ammo bitta qarshi hujumdan gol o'tkazib yubordik. Qolaversa, o'yin davomida bir nechta vaziyatlarni ko'kka sovurdik. O'mon termasiga qarshi o'yin ham xuddi shunday o'tdi. Oldindagi raqibda esa kuchli va mahoratli futbolchilar yig'ilgan. Albatta, ushbu jamoaga ham etarlicha tayyorgarlik qilamiz va ijobiy natija qayd etamiz.

- Yangi murabbiy qo'l ostida ushbu musobaqada, qolaversa, Osiyo Kubogida qanday maqsadlar ko'zlanmoqda?

- Ayni vaqtdagi musobaqa barcha uchun Osiyo Kubogiga tayyorgarlik vazifasini o'tab bermoqda. Qolaversa, barcha uchrashuvlar qizg'in va kurashlarga boy o'tmoqda. Shunday ekan, musobaqada iloji borija yaxshi natja qayd etishimiz kerak. Osiyo Kubogida esa kamida guruhdan chiqish vazifasi qo'yilgan. Albatta, Osiyo Kubogida ham bor kuchimiz bilan iloji boricha uzoqroqqa borishga harakat qilamiz.

- Endi shaxsiy faoliyatingiz haqida suhbatlashsak. Nega “Surxon” jamoasidan ketdingiz va nega aynan "Neftchi"ni tanladingiz? Sababi "Neftchi" jamoasiga kelgan murabbiy Vitaliy Levchenko bilan bog'liqmi?

- Bilasizmi, aslida "Neftchi" jamoasi menga o'tgan yili yozda taklif bilan chiqqandi. Lekin "Surxon" jamoasi meni qo'yib yubormadi. Keyinchalik qishki transferda men "Neftchi" bilan shartnoma imzoladim. Vitaliy Levchenkoning kelishi ham albatta "Neftchi" jamoasiga kelishimga sabablardan biri bo'lgan.

- "Neftchi" jamoasi mavsum boshini yuqori darajada boshladi. Jamoa bir necha tur turnir jadvalida peshqadam ham bo'lib turgandi. Lekin oxirgi turlarda jamoa duranglarni kupaytirib yubormadimikan?

- To'g'ri, mavsum boshida g'alabalar va turnir jadvali biz uchun qoniqarli edi. Lekin oxirgi turlarda ko'plab durang natijalar barchani hayron qoldirmoqda. Oxirgi uchta o'yin ham biz kutgan natija bilan yakunlanmadi. "Turon" jamoasi bilan juda yaxshi o'yin o'tkazayotgandik, lekin keraksiz vaziyatda gol o'tkazib yubordik. "Buxoro" jamoasi bilan esa keraksiz penalti evaziga g'alaba durangga aylandi. "Surxon" bilan ham xuddi shunday. Lekin, ishonamizki, oldinda turgan ikkita uchrashuvda g'alaba qozonamiz va "Neftchi" turnir jadvalida oldingi o'rniga qaytadi.

Shohruh Meylixolov suhbatlashdi

Zoir Jo'raboev: "CAFA musobaqasi Osiyo Kubogiga tayyorgarlik vazifasini o'tab bermoqda"