Peshqadam “Zomin” turdan-turga Pro-liga sari dadil qadam tashlamoqda. 16-turda klub o'z maydonida “G'ijduvon”ni qabul qilib, juda muhim g'alabani qo'lga kiritdi. Jamoaning bugungi kundagi kayfiyati, moliyaviy jihati borasida bosh murabbiy Asqar Umarovning fikrlariga quloq soldik.

- “G'ijduvon” bilan juda muhim o'yin edi”, - deya so'z boshladi Umarov. Mavsum davomida qilgan mehnatlarimizning samarasini ko'rsatishimiz lozim edi. To'g'risi, o'yin qiziqarli va kurashlarga boy tarzda kechdi. Raqib ham juda yaxshi shakllangan va o'yin mobaynida bir nechta qulay vaziyatlarga ega bo'ldi. G'alabaga ishtiyoqimiz yuqori ekanligi sababli, muhim bo'lgan uch ochkoni qo'lga kiritdik.

- Nazaringizda, bu yilgi Birinchi liga bahslari qanday kechmoqda?

- O'yinlar juda qizg'in kechmoqda. Raqobatbardosh jamoalar soni oshgan va turdan-turga qiziqarli bellashuvlar soni ortgan. Bu esa ligaga bo'lgan qiziqishni oshirmasdan qolmaydi. “Zomin” peshqadam sifatida turnir jadvalini boshqarayotgan bo'lsa-da, hech bir o'yinda osonlikcha g'alabani qo'lga kiritmayapti. Shu o'rinda aytish kerak, “Zomin” Pro-ligaga chempion sifatida yo'l olmoqchi. Ortimizdan “Navbahor-Farm” izma-iz taqib qilmoqda. “G'ijduvon” va “Neftgazmontaj” ham yaxshi ishtirok etib, bizga qarshilik ko'rsatishi mumkin.

- Bugungi kunda jamoaning moliyaviy holati qanday?

- Hammasi joyida. Maosh va mukofat pullari berib borilmoqda. Rahbariyat futbolchilarni moliyaviy tomonlama rag'batlantirmoqda. Qisqasi, aytarli muammo yo'q.

"Zomin" bosh murabbiyi Asqar Umarov: “Pro-ligaga chempion sifatida yo'l olmoqchimiz”