Водийда бўладиган ҳар қандай дербини мухлислар интиқлик билан кутишади. Кеча эса ҳудудий жиҳатдан ҳам, турнир жадвалида ҳам бу жамоаларнинг «қўшни» эканлиги ўйинга бўлган қизиқишни икки хисса орттирди. Қўқонлик Маликжон Мелиқўзиев 64 ёшда бўлишига қарамасдан дербини ўйингоҳда кўриш учун Андижонга велосипедда йўлга чиқдилар. Бугун Маликжон амакини «Қўқон-1912» жамоаси раҳбарияти Қўқондаги «Марказий» ўйингоҳга таклиф қилишди.

«Қийналмадингизми амаки?» деган саволга Маликжон амаки «Эрталаб соат 6 да йўлга чиқиб Андижонга тушдан кейин соат 3 ларда етиб бордим. Андижоннинг Қўқонга нисбатан бироз баландроқда жойлашганлиги сабабли мўлжаллаганимдан бироз секинроқ етиб бордим. Бироқ ўйиндан сўнг барча чарчоқлар эсдан чиқиб яна куч-қувватга тўлиб қолгандай бўлдим. Барча футболчилар ва мураббийларга миннатдорчилик билдираман. Мана шундай ғалабалар давомли бўлсин. Сизлар ғалаба қозониб турсаларинг биз мухлислар чарчамаймиз», деб жавоб қайтарди.

Жамоа аъзолари жонкуяр мухлисга миннатдорчилик тариқасида «Қўқон-1912» жамоасининг оригинал футболкасини совға қилишди. Шунингдек Маликжон амакига навбатдаги турда бўладиган «Олмалиқ» жамоаси билан ўйинга марказий сектордан чипта ҳам тақдим қилинди. Энди Маликжон амаки севимли жамоасининг сафар ўйинларига жамоа ҳисобидан текинга бориши мумкинлиги фахрий мухлисни беҳад қувонтирди. Зеро футбол мухлислар учун ўйналади. Биз фидоий мухлис Маликжон амакига соғлик – саломатлик тилаймиз.

Акрамжон Мамадалиев.

64 ёшли қўқонлик мухлис Андижонга велосипедда борди