Йил бошида таркибда фақат Мурод Зуҳуров қолганини инобатга олсак, ёш посбон тажрибали киперга рақобатчилик қилиши керак эди. Фикримизча у ўзининг жамоадаги дастлабки мавсумидаёқ мухлислар эътиборига тушди. Қийин паллаларда, муқаррар голлардан қутқарди. Терма жамоадан чорлов қабул қилди. Биз футболчи билан суҳбатлашдик.

- Бу йил илк бор “Бунёдкор” либосида майдонга тушдингиз. Клубдаги дебют мавсум сиз учун қандай ўтди?
- Йил аввалида, жамоамизни совринли ўринлар учун курашишини ҳеч кимнинг хаёлига келмаганди. Жамоадаги ички муҳитни яхшилиги ҳисобига шундай ютуқларга эришдик деб ўйлайман. Боллар ҳам мураббийнинг кўрсатмаларини майдонда тўғри бажаришга ҳаракат қилишди. Вадим Абрамов фақат ўз ўйинимизни ўйнашимизни, натижа эса ўз ўзидан келишини таъкидладилар.Кўриб турибсиз қилинган меҳнатларимиз самараси узоқ куттирмади. Учинчи ўрин клуб тарихида илк бор қайд этилди. Олдинги йилларда олтин ва кумуш меддалари жамғарилган экан.

- Жамоа деярли барчасини нолдан бошлади. Ҳатто шундай вазият бўлдики, “Бунёдкор” анча вақтгача ўз майдонида учрашувларни ўтказа олмади. Мавжуд қийинчиликлардан қандай чиқиб кетилди?
- Мени фикримча жорий йилни ёмон ўтказмадик. Юқорида айтганимдек мураббий фақат футболни ўйлаш кераклигини тушунтирди. Гарчи, таркибимизда ёшлар кўп бўлсада ҳар бир баҳсда мазмунли ўйин кўрсатишга ҳаракат қилдик. Муҳлислар учун эсда қоларли томони бизни кўрсатган ўйинимиз бўлди.

- Дарвозабонлар мураббийи Абдусаттор Раҳимов билан биринчи маротаба ишладингиз. Бу инсон ҳақида аввал ҳам билармидингиз?
- Улар ҳақида бу ерга келгунимга қадар жуда кўп илиқ фикрлар эшитгандим. Кўпни кўрган, тажрибали мутаҳассис эканликларига амин бўлдим. Игнатий Нестеров, Павел Бугало, Мурод Зуҳуров каби дарвозабонларни шуғуллантирганлар. Фақат ижобий фикр билдириш мумкин.

- Ўзингиз учун якунига етаётган йилда нимани кашф қилдингиз?
- Фаолиятимда биринчи бор совринли ўринлар учун курашда қатнашдим. Собиқ жамоам “Нефтчи” ўртамиёна клуб саналарди. Барибир, олдига юқоримақсадларни қўйган клубларда масъулият ва талаб бошқача бўлади. Албатта, босим юзага келиши турган гап. Муҳими уни енгиб ўтиш.

Абдулазиз Искандаров суҳбатлашди.

Абдумавлон Абдужалилов: “Бунёдкор”нинг совринли ўринлар учун курашишини ҳеч ким кутмаганди"