- Бугунги учрашув борасидаги фикрларингиз?

- Самарқандда оғир учрашув бўлишини кутгандик. Чунки, «Динамо» Олий Лигадан қуйи лигага тушган бўлсада, ҳозирда яна Олий Лигага қайтишни мақсад қилган. Шуни билган ҳолда Самарқандга пухта тайёргарлик билан келгандик. Шу билан бирга рақиб ҳам бизга қарши яхши тайёргарлик кўрганлиги кўринди. Улар тажриба бобида устун келишди. Бугун омад ҳам улар томонда бўлди ва ғалаба қозонишди. Ўйлайманки, кейинги ўйинлардан биз яна мақсадимиз сари олға интиламиз.

- Ўйин жуда кескин ўтди, огоҳлантиришлар, четлатиш ва пенальти. Ўйинга нимадир таъсир қилдими?

- Учрашувнинг кескин ва асабий ўтишини кутгандик. Ҳакамлар қарорларига келсак, уларни ишини баҳолаш менинг эмас, назоратчиларнинг ваколатига киради. Мен фақат шогирдларим ўйини ҳақида гапиришим мумкин.

- «УзДонгЖу» 3-турда «Зомин»га қарши майдонга тушиши керак эди. Баҳс ўтказилмагач, жамоангизга техник ғалаба ёзилди. Шу куни Янгиердаги ўйин ўтказилмаслигига нима сабаб бўлди?

- Мезбон жамоа «Зомин» ўйиннинг Янгиерда ўтишини маълум қилганди. Учрашувга ўз вақтида етиб бордик, аммо «Янгиер» стадионида ўйин ўтказилмаслигини билдиришди. Бизга айтилишича, мезбон жамоа ва стадион Янгиерда ўтиши керак бўлган ўйинни Сирдарё вилояти ИИБга маълум қилмаган. Яъни уларга айтиб, рухсат олишмаган. Чунки стадионда тартибни сақлаш ходимлари бўлиши шарт.

- «УзДонгЖу» 4 ўйинда 9 очко жамғарди. Бу ёмон натижа эмас. Клуб олдига муайан вазифа қўйилганми?

- Албатта. Ҳар бир клуб ва мураббийнинг ўз олдига қўйган мақсади бўлади. Биласиз, «УзДонгЖу» 2008 йилда Олий Лигада иштирок этганди. Бу йил ҳам биринчи ўринни эгаллаб, Олий Лигага чиқишни мақсад қилганмиз.

«Динамо» Матбуот хизмати.

Абдурашид Исмоилов: "УзДонгЖу"нинг мақсади биринчи ўринни олиб олий лигага чиқиш"